کۆمەکا ڤەکۆلینێن نوى دیار دکەن کو ئەو دەرمانێن بۆ کێمکرنا کێشێ دهێنە بکارهێنان دبنە ئەگەرێ کێمکرنا مەترسییا تووشبوونێ ب شێرپەنجا مەمکى یان مرنێ ب وێ نەخۆشیێ ب رێژەیا ٣٠٪
ل جیهانێ ملیۆنان کەس دەرمانێن کێمکرنا کێشێ بۆ چارەسەریا قەڵەویێ بکاردهینن و زنجیرەیەکا ڤەکۆلینان کو ل کۆنفرانسێ جیهانیێ شێرپەنجێ ل شیکاگۆ هاتینە نیشاندان ئاماژە ب وێ یەکێ دکەن کو ئەڤ دەرمانە رۆڵەکێ گرنگ د خۆپاراستن و چارەسەرکرنا شێرپەنجێ دا دگێڕن
ل دویڤ رۆژنامەیا گاردیان یا بەریتانى ئەنجامێن ڤەکۆلینان د کۆمبوونا سالانە یا کۆمەلا ئەمریکى یا شێرپەنجێ دا هاتینە دیارکرن و ئێک ژ شیکاریکارەکان دیار کرییە کو ئەو کەسێن دەرمانێ “GLP-1” وەرگرتییە ب رێژەیا ٣٠٪ کێمتر تووشى شێرپەنجا مەمکى بووینە کو بەلاڤترین جۆرێ شێرپەنجێ یە ل جیهانێ
هەروەسا ڤەکۆلینەکا دى ئاشکرا کرییە کو زێدەکرنا دەرمانێ کێمکرنا کێشێ بۆ سەر چارەسەریێن ئاسایی یێن شێرپەنجا مەمکى مەترسییا مرنا نەخۆشان ب رێژەیا ٣٠٪ کێم کرییە و د ڤەکۆلینەکا سیێ دا کو نەخۆشێن شێرپەنجا مەمک و سیه و کۆڵۆن و جەگەر گرتینە دەرکەفتییە کو ئەو کەسێن دەرمانێ کێمکرنا کێشێ بکارهینای ئەگەرێ بەلاڤبوونا نەخۆشیێ د لەشێ وان دا ب رێژەیا ٥٠٪ کێم بوویە
دکتۆر ئەلیزابێس ماکدۆناڵد مامۆستایێ تیشکێ ل زانکۆیا پێنسلڤانیا ئاماژە ب وێ یەکێ کر کو ئەڤە بەڵگەیەکێ ب هێزە بۆ هندێ کو وەک ئامرازەکێ نوى بۆ خۆپاراستن ژ شێرپەنجێ سەیری ڤان دەرمانان بهێتە کرن ل لایەکێ دى دکتۆر ئەلیۆنۆرا تێپلینسکى پسپۆڕا شێرپەنجێ دبێژیت هێشتا روون نینە کا ئەڤ مفایە تەنێ ژبەر کێمبوونا کێشێ یە یان ئەگەرێن بایۆلۆژى یێن دى ل پشتن
رێکخراوا تەندروستى یا جیهانى ئاماژە ب وێ یەکێ دکەت کو سالا ٢٠٢٥ ئێک بوویە ژ وان سالێن زۆرترین حالەتێن نوى یێن شێرپەنجێ تێدا هاتینە تۆمارکرن کو گەهشتینە پتر ژ ٢١ ملیۆن کەسان و ژ وێ ژمارەیێ شێرپەنجا مەمکى ب ٢.٤ ملیۆن حالەتان وەک بەلاڤترین جۆر د ناڤ ژنان دا مایە هەروەسا د هەمان سال دا پتر ژ ١٠ ملیۆن کەسان ب جۆرێن جودا یێن شێرپەنجێ گیانێ خۆ ژ دەست دایە و پتر ژ ٧٠٠ هزار کەسان ژى ب ئەگەرێ شێرپەنجا مەمکى مرینە