گومرک لسەر ئینانا بەنزینێ دهێتە ڕاکرن؛ دۆسیا جومەیلی ژی ئەگەرەکێ گرانبوونا بەنزینێ یە:

ل دەمەکێ حکومەتا هەرێما کوردستانێ پێداچوونێ د لێخۆشبوونا باج و گومرکێ دا دکەت بۆ هاوردەکرنا بەنزینێ ب ئارمانجا دابەزاندنا نرخێ وێ، بەغدا نە ب تنێ پشکا هەرێمێ ژ بەنزینا هاوردەکری و بودجەیا سەروەری نادەت، بەلکو ڕێگریەکا دژوار ل ئینانا هەر جۆرەکێ سووتەمەنیا ناڤخۆیی بۆ باژێرێن کوردستانێ دکەت.

ل گۆری زانیاریان، پێشنیازەک پێشکێشی جڤاتا وەزیرێن هەرێما کوردستانێ هاتیە کرن دا کو باج و گومرک لسەر هاوردەکرنا بەنزینێ ب تەمامی بێنە ڕاکرن. بڕیاردان لسەر ڤێ پرسێ ڕاستەوخۆ د دەسەڵاتا جڤاتا وەزیران دا یە. چاڤەڕێ دهێتە کرن ل پاشەرۆکەکا نزیک حکومەت بڕیارا دوماهیێ لسەر ڤێ پێشنیازێ بدەت دا کو ئاسانکاریێن مەزن بۆ بازرگانان بێنە کرن.

د چەند ڕۆژێن بۆری دا، نزیکی 50 ملیۆن لیترێن بەنزینا سوپەر گەهشتینە بازاڕان، ب ڤێ چەندێ نرخێ ئێک لیتر ژ 2800 دیناران دابەزیە بۆ 1900 دیناران. نوکە حکومەتا هەرێمێ ڕۆژانە ئێک ملیۆن و 750 هەزار لیترێن بەنزینا ناڤخۆیی و دو ملیۆن لیترێن بەنزینا پاڵپشتیکری ب نرخێ 750 دیناران ل وەلاتیان بەلاڤ دکەت.

پشتی ئاشکرابوونا دۆسیا گەندەڵیێ یا عەدنان جومەیلی، بریکارێ وەزارەتا نەفتا عێراقێ و بەرپرسێ پاڵاوگەها بێجی، مامەڵەکرنا بازرگانی ل وێرێ هاتە ڕاوەستاندن و ئەڤە بووە ئەگەرێ کەمبوونا بەنزینێ و گرانبوونا نرخێ وێ ل کوردستانێ. نوکە حکومەتا عێراقێ ب تەمامی ڕێگریێ دکەت و ناهێلیت ئێک لیتر بەنزین ژ ناڤەڕاست و باشوورێ عێراقێ بێتە هەرێما کوردستانێ.