حەیدەر عەبوودی پەیڤدارێ حکومەتا عیراقێ راگەهاند کو مووچەیێ فەرمانبەران و خانەنشینان یێ دابینکرییە و مەلەفێ مووچەی چ مەترسی ل سەر نینن و هاوکات ئاماژە ب وێ یەکێ کر کو د سەرەدانا داهاتی یا سەرۆکوەزیران عەلی فالح زەیدی بۆ واشنتن دێ چەندین دۆسیە و دەسپێشخەریێن گرنگ گەنگەشە کەت
رۆژا چوارشەمبی ١٠ حوزەیرانا ٢٠٢٦ حەیدەر عەبوودی پەیڤدارێ حکومەتا عیراقێ د لێدوانەکێ دا بۆ میدیایێن فەرمی راگەهاند کو سەرەدانا داهاتی یا سەرۆکوەزیران بۆ وڵاتێن ئێکگرتی یێن ئەمریکا دێ چەندین دەسپێشخەریێن گرنگ دگەل خۆ دگریت و دیار کر کو سەرۆکوەزیران کار دکەت داکو د ماوەیەکێ دیارکری دا چەک تەنێ د دەستێ دەولەتێ دا بیت
سەبارەت ب رووبەرووبوونا گەندەڵیێ عەبوودی جەخت کر کو سەرۆکوەزیران چاوپۆشیێ ل گەندەڵیێ ناکەت و ناڤێن هەمی وان کەسان ئاشکرا دکەت یێن کو گەندەڵیێ دکەن و یاریێ ب سامانا گشتی یا وڵاتی دکەن و راگەهاند ژی کو مووچەیێ فەرمانبەران و خانەنشینان یێ دابینکرییە و چ پێنگاڤ بۆ چاپکرنا دراڤێ نوی نینن
پەیڤدارێ حکومەتێ گۆت ژی کو حکومەت پابەندە ب دانا شایستەیێن دارایی یێن گرێبەستان و فەرمانبەرێن رۆژانە بەلێ گواستنا وان بۆ سەر میلاکێ هەمیشەیی یێ بودجەی ل دەف وەزارەتا دارایی یە و ئەو کار بۆ تەمامکرنا کابینا وزاری دکەن هەروەسا گۆت ژی کو عیراق قبوول ناکەت ببیتە ژێدەرێ هێرشێ بۆ سەر چ وڵاتێن جیران و رێگێ ژی نادەت چ وڵات دەستوەردانێ د کاروبارێن ناڤخۆ یێن عیراقێ دا بکەن