بادینان دەیلی:
رێڤەبەرێ ساخلەمیا کۆیە رادگەهینیت کو ژبەر شەڕێ نوکە یێ د ناڤبەرا ئیران، ئیسرائیل و ئەمریکا دا، وان جەخت ل سەر هێڵا پێشیێ یا ساخلەمیێ کریە کو ئەو ژی پشکێن هەوارچوونێ نە، ب تایبەت دابینکرنا پێدڤیان و راهێنانا کارمەندان.
ئەڤرۆ سێشەمبی، ٣١ـی ئادارا ٢٠٢٦ێ، د. محەممەد فەرمان، رێڤەبەرێ ساخلەمیا کۆیە بۆ دەزگەهێن راگەهاندنێ دیار کر کو ئەو کار دکەن بۆ باشترکرنا کوالێتیا تیمێن هەوارچوونێ، دا کو د ئەگەرێ هەر ئاڵۆزیەکێ دا ل وێ دەڤەرێ، بشێن رەوشێ کۆنترۆڵ بکەن.
کێشەیا ئەمبولانسان و وەزارەتا دارایی
د. محەممەد فەرمان گۆت: “نوکە مە ٩ ئەمبولانس هەنە، بەلێ تنێ ٣ ژ وان بۆ ڤەگوهاستنا نەخۆشان د گونجای نە، یێن دی یێن کۆنن و کێماسیێن وان هەنە.” ناڤبری ئاماژە ب هندێ ژی کر کو دو ساڵە داخوازا ٣ ئەمبولانسێن نوو کرینە، هەرچەندە ئەنجوومەنێ وەزیران رەزامەندی دایە، بەلێ تا نوکە وەزارەتا دارایی رەزامەندییا دوماهیێ نەدایە.
رێڤەبەرێ ساخلەمیا کۆیە ئاشکرا ژی کر کو د ساڵا دەربازبووی دا، ب بهایێ ٢.٥ ملیۆن دۆلاران کەلوپەل و پێدڤیێن پزیشکی بۆ کۆیە هاتینە دابینکرن، و ب نێزیکی دێ ئامیرێ “قەستەرێ” ژی گەهیتە باژاری.
هاریکاریا “نوشدارێن بێ سنوور” یێن بەلجیکی
دووێ شەمبی، ٣٠ـی ئادارا ٢٠٢٦ێ، تیمەکا رێکخراوا “نوشدارێن بێ سنوور” (MSF) یا بەلجیکی سەرەدانا کۆیە کر. ئارمانجا سەرەکی یا ڤێ سەرەدانێ هاریکاریکردنا کەرتی فریاکەوتنا کۆیە بوو ب رێکا راهێنانا کارمەندان، ب تایبەت کو کۆیە د ڤی شەڕی دا چەند جارەکا کەفتیە بەر هێرشێن ئیرانێ.
عەلی سەڵتە، پەرستار و راهێنەرێ هەوارچوونا دەسپێکێ ل رێکخراوا ناڤبری گۆت: “ئەم یێن بەرهەڤین بۆ راهێنانا ستافێ ١٢٢ و کارمەندێن نەخۆشخانەیێن فریاکەوتنا کۆیە، دا کو د ئەگەرێ هەر هێرشەکێ یان ئاڵۆزیەکا شەڕێ ئیران و ئەمریکا و ئیسرائیلێ دا، ب باشترین شێوە رەوشێ کۆنترۆڵ بکەن.”
ژێدەر: بادینان دەیلی