سیروان بارزانی: بڕیارێن دژی کۆڕەک تیلیکۆم هاتنە راگرتن بەری دەمژمێرەکێ

کوردستان دادگەها رەسافە ل بەغدا فەرمانەکا دادوەری بۆ راگرتنا بڕیارێن دەستەیا گەهاندنا عێراقێ دژی کۆڕەک تیلیکۆم دەرکر. سیروان بارزانی، خودانێ کۆمپانیا کۆڕەک تیلیکۆم د لێدوانەکا تایبەت دا ڕاگەهاند، بڕیارێن بەرێ یێن سەرۆکێ دەستەیا گەهاندنا عێراقێ دژی کۆڕەک تیلیکۆم بێبنەما و نایاسایی بوون. ئاماژە ب وەغێ ژی دا، ئەڤرۆ یەکشەمب 23ی ئابا 2026، دادگەها رەسافە ل باژێرێ بەغدا فەرمانەکا دەمکی یا دادوەری (ئەمر وەلائی) دەرکریە بۆ راگرتنا جێبەجێکرنا هەمی وان بڕیارێن نادادپەروەرانە ئێن دژی کۆمپانیێ هاتینە دەرقەستکرن. خودانێ کۆمپانیا کۆڕەک تیلیکۆم جەخت ل سەر وێ یەکێ کر، ئەڤ پێنگاڤا دادگەها رەسافە بەرپەرچدانەکە بەرامبەر وی ستەما ل وان هاتبوو کرن، هەروەسا دوپات کر کو ئەوان هەمیشە باوەری بە دادپەروەری و رێکارێن یاسایی هەبوویە. د دەمێ بوری دا دەستەیا گەهاندنا عێراقێ ڕاگەهاندبوو، کۆڕەک تیلیکۆم ب بڕا نێزیکی ئێک ملیار و 500 ملیۆن دۆلاران قەرزدارا دەولەتێ یە، لەوما د چەند ڕۆژێن بوری دا بە هەماهەنگی دگەل دەزگەهێ ئاسایشا نیشتمانی یا عێراقێ، نوسینگه‌ها سەرەکی یا کۆمپانیێ ل دەڤەرا جادریە و سێ بنکەیێن دی یێن فرۆشتنێ ل بەغدا گرتن. هەروەسا گەفێن راگرتنا تەمامی یا خزمەتگوزاریێن کۆڕەک تیلیکۆم و دەستبەسەرداگرتنا مال و ملکێن وێ کربوون. ل هەمبەر دا، کۆمپانیا کۆڕەک تیلیکۆم ئەڤ پێنگاڤە ب نایاسایی و سیاسی لەقەلەم دان، نەمازە پشتی کو ل ساڵا 2025ێ رێککەفتنەک بۆ چارەسەرکرنا کێشەیان و دانانا مۆڵەتا نەوەیێ چوارێ ئیمزا کری، بەلێ دەستەیێ رێککەفتن هەڵوەشاندبوو.