رێڤەبەرێ کۆمپانیا گشتی یا بازرگانیا دانەوێڵەی ل وەزارەتا بازرگانیا عیراقێ راگەهاند کو کۆمپانیا وان دێ دەست ب دابەشکرنا شایستەیێن دارایی یێن جوتیاران کەت بۆ پرۆسەیا وەرگرتنا گەنمێ سالا ٢٠٢٥
ئەڤرۆ سێشەمبی ٢ حوزەیرانا ٢٠٢٦ حەیدەر نوری گەرعاوی د کۆنگرەکێ رۆژنامەڤانی دا گۆت کۆژمێ ئێک تریلیۆن و ٥٤٥ ملیار دینار وەک شایستەیێن دارایی یێن جوتیاران بۆ سالا بوری هاتینە دیارکرن و نها ل سەر رێنمایێن سەرۆکێ ئەنجوومەنێ وەزیران ناوەندێن بازرگانی چاڤەڕێی وەزارەتا دارایی نە داکو وی پارەی خەرج بکەت
ل لایەکێ دی وەزارەتا بازرگانیا عیراقێ راگەهاند کو کۆمبوونا لژنەیا ناڤەندی یا بازاڕکرنێ هاتییە ئەنجامدان بۆ گەنگەشەکرنا وەرزی نوکە یێ سالا ٢٠٢٦ و د کۆمبوونێ دا چەندین بابەتێن هونەری و کارگێڕی هاتنە باسکردن داکو کارئاسانی بۆ جوتیاران بهێنە کرن و رێکارێن وەرگرتنا بەرهەمی ب زووترین دەم و بێی قەرەبالغی بڕێڤە بچن
هەروەسا گەرعاوی جەخت ل سەر توندکرنا رێکارێن چاڤدێریێ ل بازگەیێن دەرەکی کر داکو رێگری ل ڤەگوهاستنا گەنمێ ناڤخۆیی د ناڤبەرا پارێزگەهان دا بهێتە کرن و ئەڤە ژی بۆ پاراستنا دادپەروەریێ د دابەشکرنێ دا هەروەسا دوپات کر کو پشکنینێن تاقیگەهی ب وردی دێ بۆ گەنمی هێنە کرن داکو کوالیتیا بەرهەمی بهێتە پاراستن و کۆمکرنا گەنمی ب شێوازەکێ هونەری و دروست بیت
د دویماهیێ دا ئاماژە ب وێ یەکێ هاتە کرن کو کۆمپانیا بازرگانیا دانەوێڵەی بەردەوامە ل سەر دویڤچوونا مەیدانی ل هەمی پارێزگەهان داکو پاڵپشتیا پێدڤی بۆ جوتیارێن عیراقێ دابین بکەت و وەرزی نوکە یێ گەنمی ب سەرکەفتیانە ب دوماهی بهێت