رێڤەبەریێن نەوت و کانزایان ل پارێزگەهێن هەرێمێ ئاشکرا دکەن کو پرۆسەیا دابەشکرنا گازی بۆ وەلاتیان ئاسایی بوویە و نرخ ژی یێ جێگیرە و ل سلێمانیێ ژی کارئاسانی بۆ وەلاتیان هاتییە کرن
ئۆمەر عەبدوڵڵا سەرۆکێ لیژنا گازی ل سلێمانیێ راگەهاند کو ژ پێخەمەت کارئاسانیێ بۆ وەلاتیان بڕیار هاتییە دان ژ ئەڤرۆ و پێدا دابەشکرنا گازی بێی پسوولا خوارنێ بیت داکو هەمی کەس ب ساناهی دەست ب بوتڵێن گازی بگەهیت و دڵنیایی دا کو گاز ب بڕێ پێدڤی ل بازاران دا هەیە و وان ژ نوکە ڤە دەست ب کۆمکرن و خەزنکرنا گازی کرییە داکو بۆ وەرزی زستانێ چ کێشە بۆ خەلکی پەیدا نەبن
سەبارەت نرخێ گازی سەرۆکێ لیژنا گازی جەخت کر کو نرخ یێ جێگیرە و هەر بوتڵەک ب ٨ هزار و ٥٠٠ دیناران ب وەلاتیان دهێتە فرۆشتن و بڕێ گازی یێ بۆ پارێزگەهێن دهۆک و هەولێر و سلێمانیێ هاتییە تەرخانکرن وەک خۆیە و چ گوهۆڕین ب سەر دا نەهاتینە
ل لایێ دی کارزان رەئووف رێڤەبەرێ نەوت و کانزایان ل دهۆکێ راگەهاند کو پشتی ماوەیەکێ درێژ ژ کێمیا گازی ژ ئەڤرۆ و پێدا دابەشکرنا گازی ئاسایی بوویەڤە و دیار کر کو ژبەر وێ کێمیا ل ماوێ بوری هەبووی بۆشاییەک د بازاران دا پەیدا ببوو و تەنێ چەند رۆژەک پێدڤی نە داکو ئەو بۆشاییە ب تەمامی بهێتە پڕکرن و رەوشا دابەشکرنێ ل هەمی جهان جێگیر ببیت