ئەنجوومەنێ یەکێتییا ژوورێن بازرگانی یێن هەرێما کوردستانێ بڕیارا لێخۆشبونا گشتی د رسوماتێن سالێن بوری دا بۆ هەمی بازرگان و پیشەوەران دەرێخست و سەرۆکێ ژوورا بازرگانیا هەولێرێ ژی راگەهاند کو ئەڤ بڕیارە ل دەسپێکا مەها بهێت دێ چیتە د بوارێ جێبەجێکرنێ دا
ئەڤرۆ ئێکشەمبی 31 ئایارا 2026 گەیلان حاجی سەعید سەرۆکێ ژوورا بازرگانی و پیشەسازیا هەولێرێ د کۆنگرەکێ رۆژنامەڤانی دا دیار کر کو ژبەر رەوشا دارایی ئەنجوومەنێ یەکێتییا ژوورێن بازرگانی بڕیار دا ب لێخۆشبونا گشتی کو هەمی بازرگان و پیشەسازی و پیشەوەرێن هەرێمێ د هەمی کەرتان دا دگریتەڤە
سەرۆکێ ژوورا بازرگانی ئاماژە ب وێ یەکێ کر کو ئەڤ بڕیارە پشتی وێ چەندێ هات کو بەشەک ژ بازرگانان ژبەر قەیرانێ نەشیاینە ناسنامێن خۆ نوی بکەنەڤە و راگەهاند ژی کو ئەڤ لێخۆشبونە ل 1 حوزەیرانا 2026 دەستپێ دکەت و تا 30 تشرینا دویێ 2026 دێ بەردەوام بیت و د ڤێ چارچۆڤێ دا تەنێ رسوماتێن دوو سالێن دوماهیێ ژ بازرگانان دهێنە وەرگرتن و سالێن بەری هینگێ هەمی هاتینە ژێبرن
هەروەسا گۆت هەر بازرگانەک بۆ ماوێ چوار سالان سەرەدانا ژوورێن بازرگانی نەکەت بۆ نویژەنکرنا ناسناما خۆ هەتا دویماهیا وادەیێ دیارکری مافێ ئەندامیەتێ ل دەف نامینیت و ئەگەر پشتی وێ سالێ ژی داخوازا ئەندامیەتێ بکەتەڤە دێ هەمی قەرزێن سالێن بوری ژێ هێنە وەرگرتن و بۆ ماوێ سالەکێ ژی مافێ ئەندامیەتێ پێ ناهێتە دان
گەیلان حاجی سەعید روون کر کو ئەڤ بڕیارە نوکە نۆسینگەهێن خانی و بەران ناگریت ژبەر یاسایا دەڵاڵیێ یا ژمارە ٥٨ بەلێ لیژنەیەک هاتییە پێکئینان بۆ دیتنا رێگەچارەیەکا یاسایی داکو ئەو ژی مفای ژ ڤێ لێخۆشبونێ وەرگرن و داخواز ژ بازرگانان کر سەرەدانا ژووران بکەن چونکی هەمی کارئاسانی دێ بۆ هێنە کرن
سەرۆکێ ژوورا بازرگانی بەحس ل پلانێن داهاتی ژی کر و گۆت حەفتیا بهێت شاندەکێ بازرگانی یێ هەرێمێ دێ چیتە ئوردنێ و پاشان ئۆزبەکستانێ بۆ بەستنا لووتکەیەکا بازرگانی کو نێزیکی 180 بازرگان و سەرمایەدارێن هەرێمێ دێ تێدا پشکدار بن و مەبەست ژی راکێشانا سەرنجا وەبەرهێنەرێن بیانی یە بۆ هەرێما کوردستانێ
د دویماهیێ دا گەیلان حاجی سەعید ئاماژە ب گرنگیا سەرەدانا مەسرور بارزانی سەرۆکێ حکومەتا هەرێما کوردستانێ بۆ بەغدا کر و گۆت ئاخفتن ل سەر کەرتێ ئابووری و چارەسەرکرنا کێشەیا سیستەمێ ئەسیکۆدا زەمینەیەکا باش خۆش کرییە بۆ چارەسەرکرنا ریشەیی یا کێشەیان د ناڤبەرا هەولێر و بەغدا دا