لاهور شێخ جەنگی ل ڕێکا تیما پارێزەرێن خۆ ڕایگەهاند کو ب چ ڕەنگەکى سوڵحێ ناکەت و داخواز دکەت دۆسیەیا وى ب شێوەیەکێ یاسایی و دوور ژ دەستێوەردانێن سیاسی ل دادگەهان بهێتە ئێكلاکرن
رۆژا پێنجشەمبی ١١ حوزەیرانا ٢٠٢٦ دانا تەقیەدین ئەندامێ تیمێ پارێزەرێن لاهور شێخ جەنگى ڕاگەهاند کو ئەڤرۆ تیمێ پارێزەران ل زیندانێ سەرەدانا لاهور شێخ جەنگى کرییە و ڕەوشا وى یا تەندروستى یا جێگیر و باشە و ئاماژە ب وێ یەکێ کر کو ناڤبرى جەخت ل سەر وێ یەکێ کرییە کو نابیت چ پێنگاڤێن دەرڤەى یاسایێ بهێنە هاڤێتن و دڤێت یاسا ل سەر هەموو کەسان بیت
ب گۆتەیا وى پارێزەرى لاهور شێخ جەنگى نیگەرانییا خۆ دیار کرییە ژ وێ یەکێ کو بەرى بەرسڤدانا دادگەها تەمیز چ پێنگاڤ د دۆسیەیا وى دا بهێنە هاڤێتن ژبەر هندێ داخواز کرییە روینشتنێن دادگەهێ نەیێنە ئەنجامدان هەتا بڕیارا دویماهیێ ل سەر داخوازێن یاسایی دەردکەڤیت و تیمێ پارێزەرێن وى ژى جەخت ل سەر گرنگییا سەربەخۆیا دەسەڵاتا دادوەری کر و ڕایگەهاند کو دڤێت ڕێڕەوێ یاسایی یێ دۆسیەیێ بێی فشار و دەستێوەردانێن لایەنێن سیاسی بڕێڤە بچیت
ئەڤ پەیاما لاهور شێخ جەنگى پشتی هندێ دهێت کو ل شەڤا ٢٢ ئابا ٢٠٢٥ ل نێزیک هۆتێل لالەزار ل سلێمانیێ شەڕەکێ گران د ناڤبەرا هێزێن یەکێتی نیشتمانی کوردستان ب سەرۆکایەتیا بافڵ تاڵەبانى و چەکدارێن سەر ب لاهور شێخ جەنگى ڕوویدا و پشتی شەڕەکێ چەند دەمژمێری لاهور شێخ جەنگى و دەیان لایەنگرێن وى هاتنە دەستەسەرکرن و د وى شەڕى دا چەندین کەس ژ هەردوولایان هاتنە کوشتن و بریندارکرن و نها ژى لاهور شێخ جەنگى د زیندانێ دایە و چاڤەڕێى بڕیارا دادگەهێ دکەت