سەرۆک مەسعود بارزانی پێشوازیا بالیۆزێ تورکیا ل عیراقێ کر و د دیدارەکێ دا دوماهى گوهۆڕینێن دەڤەرێ و پەیوەندیێن د ناڤبەرا هەولێر و بەغدا و ئەنقەرە دا هاتنە باسکرن و بالیۆزێ تورکیا دەستخۆشى ل سیاسەتا حەکیمانە یا هەرێما کوردستانێ کر بەرامبەر گرژییان
رۆژا پێنجشەمبی ٤ حوزەیرانا ٢٠٢٦ سەرۆک مەسعود بارزانی پێشوازیا ئانڵ بۆرا ئینان بالیۆزێ تورکیا ل عیراقێ کر و د وێ دیدارێ دا ئەرمان تۆپچو کونسوڵێ گشتى یێ تورکیا ل هەولێرێ ژى ئامادە بوو و هەردوولایان بیروبۆچوون ل سەر دوماهى گوهۆڕین و شەڕ و گرژیێن ل سەر ئاستێ دەڤەرێ گوهۆڕینەڤە
بالیۆزێ تورکیا پێزانینێن وڵاتێ خۆ بۆ دانبەخۆداگرتن و سیاسەتا ژیرانە یا هەرێما کوردستانێ دیار کرن کو سەربارى هندێ هەوڵ هەنە هەرێمێ تێوەگڵینن و بۆردۆمانێن بەردەوام ل سەر هەرێمێ هەنە بەلێ هەرێما کوردستانێ ب هەمی شێوەیان هەوڵ داوە نەبیتە بەشەک ژ وى شەڕ و گرژییێن ل ناوچەکێ دا رویداین
د بەشەکێ دی یێ دیدارێ دا باس ل بارودۆخێ پشتی پێکئینانا حکومەتا عیراقێ و پەیوەندیێن د ناڤبەرا هەرێمێ و بەغدا و پەیوەندیێن پارتى دگەل لایەنێن سیاسی یێن عیراقى هاتە کرن و هەردوولایان هیڤی خواست کو هەوڵ بەرەڤ چارەسەرکرنا کێشەیان و هەماهەنگییا تەمام د بوارێن جودا دا بن
هەروەسا رۆناهی خرایە سەر پەیوەندیێن هەر سێ لایەنێن عیراق و هەرێما کوردستانێ و تورکیا و گفتوگۆ ل سەر ئەنجامێن دوماهى سەرەدانا سەرۆکێ حکومەتا هەرێما کوردستانێ بۆ تورکیا هاتە کرن و جەخت ل سەر پەرەپێدانا پەیوەندی و دۆستایەتییا هەردوولایان کرەڤە و د دویماهیێ دا بارودۆخێ ناڤخۆ یێ هەرێما کوردستانێ و پێنگاڤێن پرۆسەیا سیاسی تەوەورێن دى یێن گفتوگۆیان بوون