پشتی سەرکەفتنا خولا ئێکێ یا فێستیڤاڵا کوردستان بۆ فیلمێ ژینگە رێککەفتنەکا هەڤپشک دگەل فێستیڤاڵا رووبار یا تایبەت ب ژینگێ ل وڵاتێ ئیتالیا هاتە ئیمزاکردن
ئەڤرۆ پێنجشەمبی ٤ حوزەیرانا ٢٠٢٦ پشتیوان عەبدوڵڵا رێڤەبەرێ فێستیڤاڵا کوردستان بۆ فیلمێ ژینگێ راگەهاند کو سەرکەفتنا خولا ئێکێ و بەلاڤبوونا دەنگوباسێن وێ ل میدیایێن جیهانى ب زمانێ ئینگلیزى بوو ئەگەر کو سەرنجا فێستیڤاڵێن نێودەوڵەتى بۆ لایێ کوردستانێ رابکێشیت و پەیوەندیەکا راستەوخۆ د ناڤبەرا هەردوولایان دا دروست ببیت
پشتیوان عەبدوڵڵا گۆت ژى هەردوو فێستیڤاڵ د پاشەرۆژێ دا هاریکاریێ د بوارێ ئالوگۆڕکرنا فیلمان و داخوازکرنا مێڤانان و نوێنەران و پشکدارى د چالاکیێن سینەمایى دا دکەن و ب ڤێ رەنگى فیلمێن هەلبژارتی یێن فێستیڤاڵا کوردستانێ دێ ل ئیتالیا هێنە نیشاندان و بەرهەمێن ئیتالیا ژى دێ ل کوردستانێ هێنە دیتن کو ئەڤە دەلیڤەیەکا مەزنە بۆ ناساندنا ئەزموون و کولتۆرێ سینەمایى یێ هەردوولایان
رێڤەبەرێ فێستیڤاڵا ژینگە یا کوردستانێ ئاماژە ب گرنگیا فێستیڤاڵا ئیتالیا کر کو ل سەر بنەمایێ پاراستنا ژینگێ و پەیوەندیا هونەرى ب سروشتى ڤە هاتییە دامەزراندن و سالانە د هەوایێ کرى دا و ل نێزیک رووبارەکى دهێتە ئەنجامدان و گۆت ژى ئەم هەوڵ ددەین شێوازێ بڕێڤەبرنا خولا داهاتى بگۆڕین و ل شوینا هۆڵێن سینەمایێ ل ناڤ سروشتى وەک پارکا سامی عەبدولرەحمان ل هەولێرێ ئەنجام بدەین داکو پەیاما پاراستنا ژینگێ ب رێکا سینەمایێ باشتر بگەهینین
د دویماهیێ دا پشتیوان عەبدوڵڵا دیار کر کو ئەڤ رێککەفتنە تەنێ دەسپێکە و ئارمانجا وان ئەوە دەنگێ فیلمسازێن کورد و بەرهەمێن وان یێن ژینگەیى بگەهیننە زۆرترین ژمارەیا بینەران ل جیهانێ و فێستیڤاڵا کوردستانێ ل سەر نەخشەیا سینەمایا جیهانى بدەنە نیاسین