رێڤەبەریا پۆلیسێن پارێزگەها دهۆکێ د کۆنگرەکێ رۆژنامەڤانی دا راگەهاند کو تیمێن دویڤچوون و ڤەکۆلینێ ل پۆلیسێن نەهێلانا تاوانێ و بنگەهێن پۆلیسان ل دهۆک و سێمێل و شێخان و ئامێدیێ د ماوێ بوری دا شیاینە چەندین تۆمەتباران ب تاوانێن جودا جودا دەستەسەر بکەن
رۆژا پێنجشەمبی 21 ئایارا 2026 هێمن سلێمان پەیڤدارێ پۆلیسێن دهۆکێ د کۆنگرەکێ رۆژنامەڤانی دا دیار کر کو چەندین تاوانبار ل سنورێ پارێزگەها دهۆکێ هاتینە گرتن و ئاماژە ب وێ یەکێ کر کو ئەو تاوانە پێکهاتبوون ژ دزی و خراب بکارهێنانا ئامێرێن پەیوەندیکرنێ و سۆشیاڵ میدیایێ و ساخکرنا پارێ ساختە و تەقەکرنا هەڕەمەکی و بکارهێنانا ماددەیێن بێهۆشکەر
پەیڤدارێ پۆلیسێن دهۆکێ ئاماژە کر کو 5 تۆمەتبار هاتینە دەستەسەرکرن کو پتر ژ 20 مۆبایلان و ب کۆژمێ 18 هزار دۆلاران و 7 ملیۆن دیناران دزیبوون هەروەسا ل سنورێ قەزا سێمێلێ ژی تۆمەتبارەک ب دزینا هزار دۆلاران و 2.5 ملیۆن دیناران هاتە گرتن
دەربارەی تاوانێن سۆشیاڵ میدیایێ و گەفکرنێ پۆلیسێن دهۆکێ راگەهاند کو د ماوێ مەهەکێ دا 13 تۆمەتبار ژبەر گەف و سوکایەتیکرنێ ب وەلاتیان ب رێکا مۆبایل و تورێن جڤاکی هاتینە دەستەسەرکرن و پەیڤدارێ پۆلیسان داخواز ژ وەلاتیان ب تایبەتی ژ کچ و ژنان کر کو ل دەمێ رووبەرووبوونا هەر جۆرە گەفەکێ ئێکسەر پەیوەندیێ ب پۆلیسان بکەن و سکاڵایێ تۆمار بکەن
هێمن سلێمان گۆت ژی کو د دۆسەیەکا دی دا 3 تۆمەتبار ب ئەگەرێ ساخکرنا دۆلارێن ساختە د ناڤ بازارێن دهۆک و ئامێدیێ دا هاتینە دەستەسەرکرن و پۆلیسان هوشداری دا کو هەر کەسەک ب بزانیت پارێ ساختە یێ دەف هەی نابیت بکاربینیت و دڤێت پۆلیسان ل سەر ئاگەهدار بکەت
هەروەسا ل قەزا شێخان 5 تۆمەتبار ژبەر تەقەکرنا هەڕەمەکی و هەلگرتنا چەکێ بێ مۆلەت هاتینە گرتن و ل سێمێلێ ژی تۆمەتبارەک هاتە دەستەسەرکرن کو زارۆکێن ژیێ وان د ناڤبەرا 10 تا 12 سالی دا بۆ کارێ سۆالکەریێ بکاردهینان
د دوماهیێ دا پۆلیسێن دهۆکێ پشتراستی دا وەلاتیان کو دێ بەردەوام بن ل سەر پاراستنا ئارامی و سەقامگیریا پارێزگەهێ و داخوازا هەڤکاریا پتر ژ خەلکی کر بۆ بنبڕکرنا تاوانان و سەقامگیریا دەڤەرێ