بادینان دەیلی:
هونەرمەند و خۆشنووسێ کورد، یەحیا ئەربیلی، وەک نوونەرێ کوردستانێ پشکداریێ د پێنجەمین خولا پێشانگەها نێڤدەولەتی یا مەجازی (ئۆنلاین) یا رەمەزانێ بۆ خۆشنووسیێ ل وەلاتێ هیندستانێ دکەت.
پەیاما ئاشتیێ و خزمەتا قورئانێ
یەحیا ئەربیلی دەربارەی پشکداریا خۆ راگەهاند: “ئارمانج ژ ڤێ پێشانگەهێ، خزمەتکرنا قورئانا پیرۆز و بەلاڤکرنا پەیاما ئاشتیێ یە د ناڤبەرا گەلان دا.” هەروەسا ئاماژە ب وێ یەکێ کر کو پێشانگەها ئەڤسالە هونەرمەندێن 40 وەلاتێن جیهانێ ل سەر پلاتفۆرمەکا مەجازی کۆم دکەت، کو تێدا رەنگدانەڤەیا کلتوورێن جودا یێن جیهانێ د وارێ خۆشنووسیێ دا دهێتە نیشاندان.
د ڤێ پێشانگەهێ دا، هونەرمەندێن چەندین وەلاتان پشکدارن، ژ وان ژی: تایلاند، بەریتانیا، ئەمریکا، وەلاتێن عەرەبی، هیندستان، پاکستان، تورکیا، یابان، کازاخستان، ئیران و چەندین وەلاتێن دی.
جوانیا پیتان و مانا رۆحی
ئەربیلی بەحسێ گرنگیا تابلۆیان دکەت و دبێژیت کو ئەڤ بەرهەمە ئیلهام ژ پەیڤ و گۆتنێن جوان وەرگرتینە. تابلۆ تەنێ نیشاندانا پیتان نینە، بەلکو دگوهرن بۆ توخمەکێ بینراو یێ کو مانا و رۆحیەتەکا بلند د ناڤ دا هەیە. بڕیارە ئەڤ پێشانگەهە ل 12ـی ئادارا 2026 ل هیندستانێ دەستپێبکەت و بۆ دەمێ 18 رۆژان یا بەردەوام بیت.
کورتەیەک ژ ژیانا یەحیا ئەربیلی
- ل باژێرێ هەولێرێ ژ دایک بوویە.
- هەلگرێ بڕواناما دبلۆم د ژمێریاریێ دا و بەکالۆریۆس د یاسایێ دایە.
- ل سالا 2010 وەک پارێزەر کار کریە و نوکە یاریدەدەرێ دادوەری یە ل وەزارەتا داد.
- ل سالا 1993 دەست ب خۆشنووسیێ کریە و ئێکە ژ دامەزرێنەرێن کۆمەڵا خۆشنووسێن کوردستانێ (1994).
- پشکداری د چەندین پێشانگەهـ و پێشبڕکێێن جیهانی دا کریە ل وەلاتێن وەک: ئیتاڵیا، مالیزیا، تورکیا، ئۆردن، میسر، قەتەر، جەزائیر، لوبنان، سعوودیە و ئیمارات.
Badinan Daily | 2026
