تیروپشکا قۆناغا ١٦ یا جاما عیراقێ هاتە راکێشان و رووبەرووبوونەوێن ئاگرین د ناڤبەرا یانەیان دا دیار بوون و دهۆک و هەولێر بەرامبەر ئێک دێ یاریێ کەن و ئەرکێ یانەیا زاخۆ ژی تا رادەیەکێ ب ساناهی یە
ئەڤرۆ دووشەمبی ١٨ ئایارا ٢٠٢٦ لێژنا پێشبڕکێیان ل فیدراسیۆنا تەپا پێ یا عیراقێ ل بەغدا ب ئامادەبوونا نوێنەرێن هەمی یانەیێن بەشدار تیروپشکا قۆناغا ١٦ یا قارەمانیا جاما عیراقێ راکێشا
ب گۆرەی ئەنجامێن تیروپشکێ یانەیا دهۆک و هەولێر ل قۆناغا ١٦ یا جاما عیراقێ ل یاریگەها دهۆکێ ب هەڤ دکەڤن و ئەڤ یارییە دێ بێی ئامادەبوونا جەماوەری هێتە ئەنجامدان چونکی یانەیا دهۆکێ ژ ئەگەرێ رویدانێن یارییا کۆتایی یا جاما عیراقێ یا وەرزی بووری بۆ چار یارییان ژ ئامادەبوونا هاندەرێن خۆ هاتییە بێبەشکرن
د یارییەکا دی دا یانەیا زاخۆ ل سەر یاریگەها خۆ دێ مێڤاندارییا یانەیا مینا کەت و یانەیا شورتە و بەحری بەرامبەر ئێک دێ یاریێ کەن و قوە جەوییە بەرامبەر کەربەلا و زەورا دگەل نەفتا میسان و یانەیا تەڵەبە ژی دێ مێڤاندارییا کەرخ کەت و یانەیا گەرمە ژی ل سەر یاریگەها خۆ دێ بەرامبەر حەشدی شەعبی یاریێ کەت
یاریێن قۆناغا ١٦ یا جاما عیراقێ ب سیستەمێ ئێک یارییا ئێکلاکەر دێ هێنە کرن و بڕیارە یاری ل رۆژا ٥ یا مەها داهاتی دەستپێبکەن و ل رۆژا ٨ ی هەمان مەه یاریێن چارەگێ کۆتایی بهێنە ئەنجامدان هەروەسا یاریێن پێشکۆتایی ژی دێ ل رۆژا ١٤ یا مەها داهاتی بن و بڕیارە یارییا کۆتایی یا جاما عیراقێ ل رۆژا ١٨ یا مەها داهاتی بهێتە کرن