دانیشتنەکا نوی یا دادگەهیکردنێ بۆ حەفت ئەندامێن تیمێ پزیشکی دهێتە ئەنجامدان، کو تومەتبارن ب کێمتەرخەمیێ و بوونا ئەگەرێ مرنا دیێگۆ مارادۆنای، ئەفسانەیێ ئەرجەنتینی. ئەگەر هەیە سزایێ ٢٥ سالێن زیندانێ ب سەر وان حەفت تومەتباران دا بهێتە سەپاندن.
ئەڤرۆ سێشەمبی، دادگەهیکردنەکا نوی دەربارەی کۆچا داویا ئەفسانەیێ تەپاپێ یێ ئەرجەنتینی، دیێگۆ مارادۆنا دەستپێدکەت، پشتی کو تومەتا کوشتنا بێ مەبەست ب ئەگەرێ کێمتەرخەمیێ ئاراستەی حەفت ئەندامێن تیمێ وی یێ پزیشکی هاتیە کرن؛ ئەڤ پێنگاڤە پشتی نێزیکی سالەکێ ژ هەلوەشاندنا دادگەهیکردنا بەری نوکە دهێت کو ب ئەگەرێ تانەدانێ د ڕێکاران دا هاتبوو ڕاگرتن.
مارادۆنا، یێ کو هەتا نوکە د بیردانکا هەوادارێن تەپاپێ دا ل ئەرجەنتینێ یێ زیندییە، ل ٢٥ێ تشرینا دووێ یا ٢٠٢٠ێ د تەمەنێ ٦٠ سالیێ دا ب ئەگەرێ جەلتەیا دلێ کۆچا داویێ کر، ئەڤە ژی د وێ دەمێ دا بوو کو د قوناغا چێبوونا تەندروستیێ دا بوو پشتی نەشتەرگەریەکا مێشکی بۆ لادانا مەینەکا خوینێ.
دادگەهەک ل باژێرۆکێ ‘سان ئیسیدرۆ’ نێزیک بۆینس ئایرس، دێ گوهداریێ ل گەواهیا نێزیکی ١٠٠ شاهدان کەت د دەمێ دادگەهیکردنا تیمێ پزیشکی یێ مارادۆنای دا ب تومەتا کێمتەرخەمیێ د گیان ژ دەستدانا قارەمانێ مۆندیالا ١٩٨٦ێ دا.
تیمێ پزیشکی یێ مارادۆنای هەر جورە پێشێلکاریەکێ ڕەتدکەن. تومەتبار پێکهاتینە ژ: ئاجۆستینا کۆزاکۆڤ پزیشکا دەروونی، لیۆپۆڵدۆ لۆکی پزیشکێ نەشتەرگەریێ، کارلۆس ئەنخێل دیاز پسپۆرێ دەروونی، نانسی ئێدیت فۆر لینی پزیشک، ڕیکاردۆ ئەلمیرۆن پەرستار، ماریانۆ ئاریێل پێرۆنی سەرۆکێ پەرستاران، و پزیشک پێدرۆ پابلۆ دی سپانیا.
پشتی دەربازبوونا دوو مەهان ب سەر ئێکەم دادگەهیکردنێ دا کو ل ئادارا دەربازبووی دەستپێکربوو، هەلوەشاندنا دادگەهیکردنێ هاتە ڕاگەهاندن دەما کو ئێک ژ سێ دادوەران ب ناڤێ ‘خۆلیتا ماکینتاش’ ژ کارێ خوە کشاندهڤە؛ ئەڤە ژی پشتی دەرکەفتنا پارچە ڤیدیۆیەکی کو تێدا چاڤپێکەفتنێ دگەل تیمەکێ وێنەگرتنێ د ناڤ ڕێڕەوێن دادگەهێ و د ئۆفیسا خوە دا دکەت وەک پشکەک ژ فیلمەکێ دۆکیۆمێنتاری، کو ئەڤە وەک پێشێلکرنا یاسایێن دادوەری هاتە هەژمارتن.
دووبارەکرنا دادگەهیکردنێ دێ وەکەت کو داواکارێ گشتی و پارێزەرێن بەرگریێ پێداچوونێ د قوناغێن جودا یێن کەیسێ دا بکەن، پشتی کو د دادگەهیکردنا ئێکێ دا وێنە، پارچە ڤیدیۆ، تۆمارێن دەنگی و بەلگەیێن پزیشکی یێن دادوەری هاتینە ئاشکەراکرن. هەروەسا چەندین شاهدان ژ وان ژی زارۆکێن مارادۆنای و ‘کلۆدیا ڤیلافانی’ هەڤژینا وی یا بەری نوکە گەواهیا خوە دایە.
ژێدەرێن ڕۆژنامەڤانی ئاماژە ب وێ کریە کو تومەتبار ئەگەر تومەت ل سەر بهێنە سەلماندن، دێ ڕووبەڕووی سزایێ زیندانێ بن کو د ناڤبەرا ٨ سالان تا ٢٥ سالان دایە.
داواکارێ گشتی د دادگەهیکردنا ئێکێ دا گوتبوو کو پزیشکان پرۆتۆکۆلێن چارەسەریێ پێشێلکرینە و ئەو مالا مارادۆنا تێدا بووی وەک ‘شانۆیا ترسێ’ وەسف کریە، چونکی چاودێریا پێدڤی بۆ نەهاتبوو دابینکرن. د بەرامبەر دا، پارێزەرێن بەرگریێ دبێژن کو مرنا مارادۆنای تشتەکێ مسۆگەر بوو ب ئەگەرێ کێشەیێن وی یێن تەندروستی یێن درێژخایەن، چونکی بۆ چەندین دەهسالان گیرۆدەی ئالۆدەبوونا کۆکاین و کحولێ ببوو.
تومەتێن کێمتەرخەمیێ د سالا ٢٠٢١ێ دا دەرکەفتن پشتی کو داواکارێ گشتی لژنەکا پزیشکی بۆ ڤەکۆلینێ د مرنا مارادۆنای دا پێکئینای؛ لژنە گەهشتە وێ ئەنجامێ کو تیمێ وی یێ پزیشکی ب شێوەیەکێ “نەگونجای، کێمتەرخەم و سەرکێشانە” سەرەدەری کریە.