بادینان دەیلی
پشتی هەلبژاردەیا ئیتالیا نەشیا د قۆناغا دویماهیێ یا پالاوتنێن مۆندیالا ٢٠٢٦ێ دا سەرکەفتنێ ل سەر هەلبژاردەیا بۆسنە بدەستڤە بینیت و بۆ جارا سێیێ ل دویڤ ئێک ژ پشکداریکرنێ د مۆندیالێ دا بێ بەهر بوو، نوکە بەرپرسێن فێدراسیۆنا تەپا پێ یا وی وڵاتی د بزاڤێن هندێ دانە راهێنەرەکێ نوی ل جهێ “گێنارۆ گاتوزۆ” دەستنیشان بکەن.
رۆژنامەیا “Tuttosport” یا ئیتالی بەلاڤکریە، کو پشتی دۆراندنا ئیتالیا بەرامبەر بۆسنە، گێنارۆ گاتوزۆ ب فەرمی دەست ژ کار کێشانا خۆ ژ پۆستێ راهێنەرایەتیا هەلبژاردەیێ راگەهاندیە. ژبەر هندێ ژی بەرپرسێن ئیتالی “ڤیچێنزۆ مۆنتێلا” وەک بژاردەیا ئێکێ دانایە، کو د نوکە دا راهێنەرێ هەلبژاردەیا تورکیایە و یاریزانێ پێشتر یێ هەلبژاردەیا ئیتالیا بوو.
هەمان رۆژنامەیێ ئاماژە ب وێ یەکێ ژی کریە، کو مۆنتێلا بخۆ حەز دکەت راهێنەرایەتیا وڵاتێ خۆ بکەت، بەلێ ژبەر کو ئارمانجا وی ئەوە ل گەل هەلبژاردەیا تورکیا پشکیداریێ د مۆندیالا ٢٠٢٦ێ دا بکەت، رەنگە د ڤی دەمی دا ئامادە نەبیت وی پۆستی وەربگریت.
ژ لایەکێ دی ڤە، ژێدەرێن وەرزشی یێن تورکیا دیار دکەن کو فێدراسیۆنا تەپا پێ یا تورکیا ب چو رەنگان دەست ژ مۆنتێلای بەرنادەت، نەخاسما کو ئەو دڤێن ئەڤ راهێنەرە هەتا یۆرۆیا ٢٠٣٢ێ ل گەل وان بەردەوام بیت، کو بڕیارە ئەو قارەمانیە ب هەڤپشکی د ناڤبەرا تورکیا و ئیتالیا دا بهێتە ئەنجامدان.