بادینان دەیلی:
جڤاتا بلندا دادوەری ل عیراقێ ئامارا فەرمی یا گرێبەستێن هەڤژینیێ و حالەتێن جودابوونا هەڤژینان (تەلاق) بۆ مەها شوباتا 2026ێ بەلاڤکر، کو تێدا بلندبوونا رێژەیا جودابوونێ دهێتە بینین.
ل گۆرەی ئامارا جڤاتا بلندا دادوەری، د مەها شوباتێ دا ب کۆم (28 هزار و 479) گرێبەستێن هەڤژینیێ د دادگەهان دا هاتینە ئیمزاکرن. د بەرامبەر دا، (6 هزار و 151) حالەتێن جودابوونا هەڤژینان هاتینە تۆمارکرن.
د ئامارێ دا هاتیە کو زۆرترین گرێبەستێن هەڤژینیێ ل باژێرێ بەغدا و ل دەڤەرا “رەسافە” بووینە کو (4086) حالەت بوون، پاشان دەڤەرا “کەرخ” ب (3447) حالەتان و پارێزگەها نەینەوا ب (2968) حالەتان د رێزا سیێ دا دهێن. کێمترین رێژەیا هەڤژینیێ ژی ل پارێزگەها موسەننا بوویە کو بتنێ (666) گرێبەست بووینە.
سەبارەت ب حالەتێن جودابوونێ (تەلاق)، دیسان دەڤەرا رەسافە ل بەغدا ب (1331) حالەتان ل رێزا ئێکێ دهێت، پاشان دەڤەرا کەرخ ب (1094) حالەتان و پارێزگەها بەسرە ب (539) حالەتان دهێت. کێمترین حالەتێن جودابوونێ ژی ل پارێزگەها واست هاتینە تۆمارکرن کو بتنێ (102) حالەت بووینە.
ئەڤ ئامارە نیشان ددەن کو رێژەیا جودابوونێ بەرەڤ بلندبوونێ دچیت، چونکی د مەها کانوونا دوویێ (چلا) یا ئەڤ سالە دا، (5999) حالەتێن جودابوونێ هەبوون، لێ د مەها شوباتێ دا ئەڤ ژمارە گەهشتیە (6151) حالەتان.
بادینان دەیلی – پشکا نووچەیان