بادینان دەیلی:
ژ دەستپێکا شەڕێ ئەمریکا و ئسرائیلێ دژی ئیرانێ ل کۆتاییا مەها شوباتێ، هەرێما کوردستانێ کەفتیە بن گڤاشتنێن دژوار یێن سەربازی. ل گۆرەی دیڤچوونەکا میدیایی، هەتا نوکە ب (503) درۆن و مووشەکان هێرش کریە سەر ئاخا هەرێمێ.
ئامارا قوربانییان
ئەڤ هێرشە بێ زیان نەبووینە؛ ل گۆرەی دووماهیک ئامارێن فەرمی هەتا ئەڤرۆ 30ی ئادارێ، (14) کەسان گیانێ خۆ ژ دەست دایە و (88) کەسێن دی ژی بریندار بووینە. ژ قوربانییێن گیان ژ دەست دای:
- 6 پێشمەرگەیێن فەرماندەییا دەڤەرا ئێک ل خەلیفان.
- 1 کارمەندێ ئاسایشێ ل فرۆکەخانەیا هەولێرێ.
- 6 پێشمەرگەیێن پارتێن رۆژهەلاتێ کوردستانێ.
- 1 سەربازێ فەڕەنسی ل هەولێرێ.
دابەشبوونا هێرشان ل سەر پارێزگەهان
پارێزگەها هەولێرێ پشکا شێر یا ڤان هێرشان بەرکەفتیە و ئامار ب ڤی رەنگی نە:
- هەولێر: 389 درۆن و مووشەک.
- سلێمانی: 96 درۆن و مووشەک.
- دهۆک: 16 درۆن.
- هەڵەبجە: 2 درۆن.
هێرشێن 24 دەمژمێرێن دەربازبووی
د شەڤ و رۆژا دەربازبووی دا، هێرش توندتر لێ هاتینە و 6 درۆنێن دی هاتینە ئارمانجکرن:
- سێ درۆن ل دویڤ ئێک ل بەرەبەیانی ئەڤرۆ دوشەمبی هێرشی سەر هەولێرێ کر، لێ ژ لایێ سیستەمێ بەرگریێ ڤە هاتنە خوار و زیانێن گیانی نەبووینە.
- درۆنەکێ هێرشی بارەگایێ بەرێ یێ نەتەوەیێن ئێکگرتی (UN) ل سلێمانیێ کر.
- ل نیڤرۆیا دوهی ژی، هێرشەکا درۆنی کرە سەر گوندێ “زڕگوێز” ل سلێمانیێ.
بریندار و زیانێن سڤیل
د ناڤ 88 برینداران دا، جودا ژ هێزێن پێشمەرگە و ئاسایشێ، (15) وەلاتیێن سڤیل هەنە، ژ وان ژی: زارۆکەک ل گەڕەکا قالاوە ل سلێمانیێ، قوتابی ل قەزا خەبات، و پەنابەرێن رۆژهەلات و رۆژئاڤا ل کەمپێن (باجد کەنداڵ، ئازادی، زەوی سپی و جەژنیکان).
ئەو دەڤەرێن هاتینە بۆردۆمانکرن
- ل هەولێر: خەبات، خەلیفان، سۆران، فەرمانبەران، عەنکاوە، پیرزین، کەسنەزان، و دەوروبەرێن فرۆکەخانەیێ.
- ل سلێمانی: زڕگوێز، مێرگەپان، تاسلوجە، کفری و چیایێ زەمنەکۆ.
- ل دهۆک: کێلگەیا نەفتی یا سەرسنکێ، کەمپا باجد کەنداڵ ل زاخۆ، سنۆرێ ئاکرێ و بجیل، بەردەڕەش و گەڕەکا مالتا ل سەنتەرێ باژێری.
جێگێ ئاماژێ یە کو ئەڤ شەڕ و ئالۆزییە ل (28ی شوباتێ) دەستپێکر، و ژ رۆژا ئێکێ وەرە هەرێما کوردستانێ بوویە ئارمانجا سەرەکی یا درۆن و مووشەکان.
بادینان دەیلی – پشکا نووچەیان