میدیایێن ئێرانێ ڕاگەهاندن کو محەمەد باقر قالیباف سەرۆکێ پەرلەمانێ ئێرانێ هاتیە ڕاسپاردن بۆ سەرپەرشتیکرنا پەیوەندیێن وەلاتێ وی دگەل چینێ
ئەڤرۆ ڕۆژا ئێکشەمبی 16ێ گولانا 2026ێ ئاژانسا تەسنیم ژ زارێ ژێدەرێن ئاگەهدار دیار کر کو محەمەد باقر قالیباف وەک نوینەرێ تایبەت یێ وەلاتێ خۆ بۆ کاروبارێن چینێ هاتیە دەستنیشانکرن
هەڤدەم دگەل ڤێ بڕیارێ ڕاپۆرتەکا نهێنی یا هەواڵگریا ئەمریکا کو ڕۆژنامەیا واشنتن پۆست بەلاڤکریە ئاماژێ ب هندێ دکەت کو چینێ جەنگێ ئێرانێ بکارئینایە بۆ دەستڤەئینانا سەرکەفتنێن سەربازی و ئابووری و دیپلۆماسی ل سەر ئەمریکا و ئەڤ یەک ژی بوویە ئەگەرێ نیگەرانیێ ل وەزارەتا جەنگ یا ئەمریکا سەبارەت تێچوویێ جیۆپۆلیتیکی یێ ڕووبەڕووبوونا دناڤبەرا واشنتن و تاران دا
ل گۆرەی ڕاپۆرتێ ژ دەما جەنگێ دژی ئێرانێ ل 28ێ شواتێ دەستپێکری چینێ چەک فرۆتیە هەڤپەیمانێن ئەمریکا ل کەنداڤی بۆ بەرگریکرنێ ژ بنکەیێن وان یێن سەربازی ل هەمبەر هێرشێن مووشەکی و درۆنێن ئیرانی هەروەسا بەیژینگ هاریکاریا وان وەلاتان کریە یێن کێشەیا وزێ بۆ پەیدابووی پشتی داخستنا گەروویێ هورمز ژ لایێ ئێرانێ ڤە کو پێنجیەکا بازرگانیا نەفتا جیهانێ د وێ ڕێ دایە
ڕاپۆرتا هەواڵگری زێدەتر دبێژیت کو ئەڤ جەنگە بوویە ئەگەرێ کێمبوونا کۆگەهێن تەقەمەنیا واشنتن کو ڕەنگە ل پاشەرۆژێ بۆ ڕووبەڕووبوونا چینێ ل سەر پرسا تایوان پێدڤی پێ ببیت و هەروەسا ڕێگە دایە بەیژینگێ کو ژ نێزیک چاودێریا شێوازێ شەڕکرنا ئەمریکا بکەت و وانەیان ژێ وەربگریت بۆ دارشتنا پلانێن خۆ یێن سەربازی د داهاتی دا