نێچیرڤان بارزانى گەهشتە بەغدا و د گەل سەرکردێن عیراقێ کۆم دبیت
بادینان دەیلى
ئەڤرۆ دووشەمبى نێچیرڤان بارزانى سەرۆکێ هەرێما کوردستانێ گەهشتە باژێرێ بەغدا دا کو چەندین کۆبوونەوێن گرنگ ئەنجام دەت
و ل دووڤ راگەهاندنا سەرۆکایەتیا هەرێمێ ئەڤ سەرەدانە بۆ گەنگەشەکرنا پرۆسەیا سیاسى و پێکئینانا حکومەتا نوو و چارەسەرکرنا کێشەیێن هەولێر و بەغدایە و بریارە پێش نیڤرۆیا ئەڤرۆ نێچیرڤان بارزانى ل مالا نورى مالیکى د گەل چوارچوڤێ هەماهەنگیێ کۆببیت و تێدا باس ل میکانیزما دابەشکرنا پۆستێن وەزارى بهێتە کرن و هەر د ڤێ سەرەدانێ دا دێ د گەل سەرۆکوەزیرێن کاربڕێخەر محەمەد شیاع سوودانى و بەربژێرێ راسپاردى عەلى فالح زەیدى کۆببیت
و لایەنێن سوننە ژى د بەرنامێ کارێ وى دانە و شاندەکێ بلند کو پێکهاتییە ژ فوئاد حوسێن و فەوزى هەریرى و فەلاح مستەفا و نورى عوسمان و عەبدولحەکیم خەسرۆ هەڤالینیا سەرۆکێ هەرێمێ دکەن و ئەڤ بزاڤە هەمی بۆ وێ چەندێ نە کو بەری جەژنا قوربانێ و چوونا حەجییان کابینەیا نوو بهێتە راگەهاندن و نەهێتە پاشخستن دا کو وادەیێ دەستوورى نەهێتە پێشێلکرن کو رۆژا ٢٧ى ڤێ مەهێ یە و پێشتر ژى عەلى زەیدى بۆ هەمان مەبەست سەرەدانا هەرێما کوردستانێ کربوو و د گەل لایەنێن سیاسى کۆببوو وەکو ئامادەکاریەک بۆ راگەهاندنا حکومەتا فیدرال ل دەمێ دیارکرى
ڕۆژنامەنووس لە بادینان دەیلی.
