:بادینان دەیلی
حکومەتا تورکیا کۆم دبیت و دۆسەیا بەرزەبوونا کچەکا کورد گەنگەشە دکەت
ئەڤرۆ دووشەمبی, 20ێ نیسانا 2026ێ, رەجەب تەیب ئەردۆغان, سەرۆککۆمارێ تورکیا, دێ سەرپەرشتیا کۆمبوونا کابینەیا حکومەتێ کەت. د وێ کۆمبوونێ دا ئێک ژ تەوەرێن سەرەکی, پرسا بەرزەبوونا (گوڵستان دۆکو) دبیت. گوڵستان دۆکو ژ سالا 2020ێ وەرە ل باژێرێ دێرسیمێ, کو بۆ مەرەما خاندنا زانکۆیێ چووبوو وێ دەرێ, چارەنڤیسێ وێ نەیێ دیارە.
حکومەتا تورکیا دخوازیت ب رێکا وەزارەتا داد و دەزگەهێ هەوالگریێ, دوماهی پێزانینان ل سەر وان لێکۆلینێن هویر یێن ل باژێرێ دێرسیمێ دیار بکەت, کو دەنگڤەدانەکا مەزن ل سەر ئاستێ مافێن مرۆڤی دروست کریە.
گەنگەشەکرنا دۆسەیا بەرزەبوونا گوڵستان دۆکو د دەمەکێ دایە, کو لێکۆلین ل دێرسیمێ چووینە قۆناغەکا نوی و پشتی دەستەسەرکرنا چەند گۆمانلێکریان, نوکە (تونجای سۆنێل) پارێزگارێ بەرێ یێ دێرسیمێ هاتیە دەستەسەرکرن و لێپرسین دگەل دا بەردەوامە.
هەروەسا د تەوەرەکێ دی یێ کۆمبوونێ دا, کابینە دێ بڕیارێ ل سەر پاکێجەکا نوی یا ئەمنی دەت بۆ پاراستنا ناڤەندێن خاندنێ, ئەڤە ژی پشتی وان هێرشێن خویناوی یێن حەفتیا دەربازبووی بۆ سەر چەند قوتابخانەیەکێ ل باژێرێن رووها و مەڕەش ل باکورێ کوردستانێ, کو بووینە ئەگەرێ گیان ژ دەستدانا زێدەتر ژ 10 کەسان و برینداربوونا ب دەهان کەسێن دی.
هەڤدەم د کۆمبوونێ دا, پرسا چەکدانانا پەکەکێ و گاڤێن یاسایی بۆ پرۆسەیا نوی یا ئاشتیێ دێ هێنە بەحسکرن.
ل سەر ئاستێ نێڤدەولەتی ژی, سەرۆککۆمار دێ بەحسێ بزاڤێن تورکیا کەت بۆ چەسپاندنا ئاگریەستێ د ناڤبەرا ئیران و ئیسرائیلێ دا و کێشەیا داخستنا گەروویێ هورمز, کو کاریگەریەکا راستەوخۆ ل سەر ئابوورێ تورکیا و بازرگانیا جیهانێ دروست کریە.
ژێدەر: بادینان دەیلی