تاران ب رێکا چەند بەرپرسێن بلند راگەهاند کو سیستەمەکێ نوو حوکمێ گەروویێ هورمز دکەت و جەخت ل سەر وێ یەکێ کر کو سەردەمێ سەپاندنا ئاسایشێ ژ لایێ هێزێن بیانی ڤە ب دوماهی هاتیە
ئێکشەمبی ١٩ێ نیسانا ٢٠٢٦ێ عەلی ئەکبەر ویلایەتی راوێژکارێ رێبەرێ بلندێ ئێرانێ د لێدوانەکێ دا کو میدیایێن وی وەلاتی بەلاڤکرینە راگەهاند سەردەمێ سەپاندنا ئاسایشێ ژ وێ لایێ زەریایان ب سەر چوو
هەڤدەم ئاژانسا ئیرنا ژ زارێ بەرپرسەکێ نڤیسینگەها سەرۆک کۆمارێ ئێرانێ بەلاڤکر کو سیستەمەکێ نوو حوکمێ گەروویێ هورمز دکەت و پێدڤی بوو ئەو وەلاتێن نیگەران بەری نوکە درک ب ڤێ راستیێ کربا
ژ ئالیەکێ دی ڤە هێزا ئەسمانی یا سوپایێ پاسدارێن ئێرانێ ئاماژە ب وێ یەکێ کر کو خێراییا نووکرن و ئامادەکرنا سەکۆیێن هاڤێژتنا مووشەکان و فڕۆکەیێن بێ فڕۆکەوان گەلەک پترە ژ وێ یا بەری دەسپێکرنا شەڕی هەبووی
ئەڤ لێدوانە د هەمان دەم دانە دگەل راگەهاندنا پەیڤدارێ سەربازی یێ بارەگایێ خاتەمولئەنبیا کو رۆژا شەمبی ١٨ێ نیسانێ راگەهاندبوو گەروویێ هورمز هەمان شێوێ دەمێ ململانێیێن سەربازی یێن ڤان دوماهیان دێ هێتە داخستن
جەخت ل سەر وێ یەکێ ژی کر کو گەروو دێ د ژێر رێڤەبەریا توند و چاڤدێریا هێزێن چەکدارێن ئێرانێ دا مینیت و ئاماژە ب وێ یەکێ کر کو بەردەوامیا ڤی بارودۆخی بەندە ب پابەندنەبوونا ئەمریکا ب گەرەنتی کرنا ئازادیا هاتن و چۆنا کەشتیان بۆ ناڤە و دەرڤەیێ ئێرانێ