هێرشەکا چەکداری کرە سەر قوتابخانەکێ ل باکوورێ کوردستانێ
د ئەنجامێ هێرشەکا چەکداری دا بۆ سەر قوتابخانەکێ ل باکوورێ کوردستانێ، مامۆستایەکێ گیانێ خۆ ژ دەست دا و پتر ژ ١٥ کەسان ژی بریندار بوون، هێرشکاری ژی پشتی ڕوودانێ کۆتایی ب ژیانا خۆ ئینا.
پەیامنێرێ کوردستان ٢٤ ل باکوورێ کوردستانێ ڕاگەهاند، پێشنیڤرۆیا ئەڤرۆ سێشەمبی، ١٤ێ نیسانا ٢٠٢٦ێ، چەکدارەکی هێرش کرە سەر قوتابخانەیا ئامادەییا پیشەیی و تەکنیکی یا “ئەحمەد کۆینجو” ل گەڕەكا حەسەن چەلەبی ل شارۆچکەیا سیوەرەکا ڕووهایێ ل باکوورێ کوردستانێ.
پەیامنێرێ مە ئاماژە ب وێ یەکێ ژی کر، د ئەنجامێ تەقەکرنێ دا، پتر ژ ١٥ کەسان بریندار بوون و مامۆستایەکێ قوتابخانێ ژی ب ئەگەرێ سەختیا برینا خۆ گیانێ خۆ ژ دەست دا.
پەیامنێرێ کوردستان ٢٤ بەحسێ وێ یەکێ ژی کر، هێرشکار گەنجەکێ تەمەن ١٧ بۆ ١٨ سالی بوویە و ب چەکەکێ لولەدرێژ چوویە د ناڤ قوتابخانێ دا؛ پاشان ب شێوەیەکێ هەڕەمەکی تەقە ل ناڤ حەوشە و ڕێڕەوێن قوتابخانێ کریە و پشتی هێرشێ ژی خۆ کوشتییە؛ ب ڤێ یەکێ ژی هەژمارا قوربانیان بۆ دوو گیان ژ دەستدانان بلند بوو.
دەستبەجێ پشتی ڕوودانێ هەژمارەکا زۆر یا تیمێن فریاکەفتنێ و پۆلیس و هێزێن چالاکییێن تایبەت گەهشتنە جهێ ڕوودانێ و دەڤەر گەمارۆدان.
حەسەن شلداک، پارێزگارێ ڕووهایێ د لێدوانەکا ڕۆژنامەڤانی دا ڕاگەهاند، هێرشبەر ناڤێ وی “عومەر کەت”ـە و ژ دایکبوویێ سالا ٢٠٠٧ێ یە.
پارێزگارێ ڕووهایێ بەحسێ وێ یەکێ ژی کر، عومەر قوتابیەکێ بەری نوکە یێ هەمان قوتابخانە بوویە، تەنێ قۆناغا نۆیێ ل وێرێ خواندییە و پاشان چوویە خواندنا ڤەکری.
ڕۆژنامەنووس لە بادینان دەیلی.
