بادینان دایلی:
سارە باکستەر، رێڤەبەرا سەنتەرێ “ماری کۆلڤین” بۆ راپۆرتێن نێڤدەولەتی، د گۆتارەکێ دا کو د پێگەهێ “ئای پێپەر” دا بەلاڤکریە، تیشکێ دئێخیتە سەر پشێوییەکا سیاسی یا کویر ل ناڤخۆیا ئەمریکا و ئاماژێ ب لەرزۆکیا پێگەهێ دۆناڵد ترهمپی و درزکەفتنا مەزن د ناڤ بزووتنەوا “ماگا” (MAGA) دا دکەت.
باکستەر دیار دکەت کو ئێدی گۆتوبێژکرن ل سەر کاراکرنا “هەموارکرنا 25ێ یا دەستوورێ ئەمریکا” بۆ لادانا ترهمپی ب ئەگەرێ نەکامیا عەقلی یان تەندروستی، بتنێ تیۆرەکا سیاسی نینە، بەلکو بوویە بەشەک ژ مشتومڕێن سیاسی ل واشنتن. هەرچەندە جێبەجێکرنا ڤێ پێنگاڤێ د واقیعدا کارەکێ گەلەک ب زەحمەتە و وەک کودەتایەکا سیاسی دهێتە دیتن، بەلێ وروژاندنا ڤی بابەتی نیشانا قەیرانەکا کویرە.
ل گوورەی گۆتارێ، ترهمپ نها روو ب رووێ شەڕەکێ ناڤخۆیی بوویە د ناڤ بنکەیێ خۆ یێ جەماوەری یێ راستڕەو دا. دیارترین کەسایەتیێن کارتێکەر وەک (تاکەر کارلسۆن، کاندیس ئۆوێنز، مێگن کێلی و ئەلێکس جۆنز) کو بەری نها پشتبەستێن سەرەکی یێن ترهمپی بوون، دەست ب ئاراستەکرنا رەخنێن توند کرینە و گومانێ ل شیانێن وی بۆ سەرکردایەتیکرنێ دکەن. نڤیسەر پێ پێ وایە ئەڤ وەرچەرخانە ب واتایا هەلوەشاندنا وێ هەڤپەیمانیا میدیایی و جەماوەری دهێت کو سێبەرەکا بهێز بۆ ترهمپی دروست کربوو.
د بەرامبەر ڤان فشاران دا، ترهمپ بزاڤێ دکەت وێنەیێ خۆ وەک سەرکردەیەکێ بهێز بپارێزیت و ب توندی هێرشێ دکەتە سەر رەخنەگرێن خۆ و ب “شکستخواری و کێم عەقل” وەسفا وان دکەت. ئەڤ پەرچەکردارە بۆ هندێ نە دا کو رێگریێ ل هندێ بکەت وەک “مراویا شەلەک” (Lame Duck) دیار ببیت – کو زارۆڤەکێ سیاسی یە بۆ سەرکردەیەکێ دهێتە بکارهینان یێ کو دەسهەلات و کارتێکرنا وی بەرەو نەمانێ دچیت.
بەشەکێ دی یێ راپۆرتێ باس ل گۆشەگیریا ترهمپی د ناڤ دامەزراوەیێن حوکمڕانیێ دا دکەت. دهێتە گۆتن کو بەرپرسێن سەربازی و سیاسی ل پشت پەردێ گۆتوبێژان ل سەر لێکەفتێن شەڕی دگەل ئیرانێ دکەن، د دەمەکێ دا ناکۆکیەکا مەزن ل سەر زانیاریێن هەواڵگری و رۆلێ ئەمریکا د گرژیان دا هەیە. باکستەر ئاماژێ ب وێ یەکێ ژی دکەت کو جوداهیا رایێ د ناڤبەرا ترهمپ و جەی دی ڤانسی جێگرێ وی دا هەیە، کو ڤانس وەک جێگرەوەیەکێ ئەگەری دهێتە دیتن و ئەرکێن دیپلۆماسی یێن هەستیار یێن پەیوەندیدار ب دۆسەیا ئیرانێ ڤە پێ هاتینە سپاردن.
هەرچەندە لادانا ترهمپی ل ڤی دەمی کارەکێ واقیعی نینە، بەلێ کۆما ڤان ئاماژان و دابەزینا ئاستێ جەماوەری ل راپرسیان دا، نیشانا هندێ نە کو ژینگەها سیاسی یا ئەمریکا هێدی هێدی خۆ بۆ ئەگەرێ گوهۆڕینا دەسهەلاتێ یان سەرلەنوێ دارشتنا نەخشێ سەرکردایەتیێ بەری ب دووماهی هاتنا خولا وی ئامادە دکەت. ئەڤ چەندە بوویە ئەگەر کو پاشەڕۆژا سەرکردایەتیا ئەمریکا تەنانەت د ناڤ دلسۆزترین بازنەیێن ترهمپی دا بکەڤیتە ژێر گومانێ.