پاکستان رۆژا ئەینیێ میوانداریا گۆتۆبێژێن ئاگر بەستا ئەمریکا و ئیرانێ دکەت
سەرۆکوەزیرانێ پاکستانێ راگەهاند کو ئیسلام ئاباد کۆتاییا ڤێ هەفتیێ میوانداریا شاندێ ویلایەتێن ئێکگرتیێن ئەمریکا و ئیرانێ دکەت پشتی راگەهاندنا ئاگر بەستێ ل دەڤەرێ
شەهباز شەریف ل سەر تۆرا جڤاکیا ئێکس نووسی کو سوپاسیا سەرکردایەتیا هەردو وڵاتان دکەت و بانگهێشتی شاندێن وان دکەت بۆ ئیسلام ئاباد ل رۆژا ئەینیێ رێکەفتی دەهێ نیسانێ تاوەکو گۆتۆبێژێن پتر بکەن بۆ گەهشتن ب رێککەفتنەکا ئێکجاری ژ پێخەمەت چارەسەرکرنا هەمی کێشەیان
پاکستان کو پێوەندیەکا نێزیک د گەل دۆناڵد ترەمپ هەیە و ب وردی چاڤدێرییا بارودۆخێ ئیرانێ دکەت وەک کەناڵەک بۆ ڤەگوهاستنا پەیامێن د ناڤبەرا تاران و واشنتن دا کار دکەت و سەرۆکوەزیرانێ پاکستانێ گۆت ژی کو ب دل و گیان هیڤیدارن گۆتۆبێژێن ئیسلام ئاباد سەرکەفتی بن د چەسپاندنا ئاشتیەکا بەردەوام دا
ئەڤ ئاگر بەستا دوو هەفتی پشتی هندێ هات کو دۆناڵد ترەمپ مۆڵەتەک دابوو بۆ وێرانکرنا ئیرانێ و ئەڤ شەرە ژی پشتی هندێ دەسپێکر کو ل بیست و هەشتێ شوباتێ ئیسرائیل و ئەمریکا هێرش کرە سەر ئیرانێ و رێبەرێ بلند یێ وی وڵاتی کوشت
شەهباز شەریف دیار کر کو ئاگر بەست هەمی جهان دگریتەڤە لێ ئیسرائیلێ پاشان راگەهاند کو ئاگر بەست لوبنانێ ناگریت چونکی ل وێرێ ئۆپەراسیۆنێن دژی حیزبوڵڵا بەردەوامن
دۆناڵد ترەمپ راگەهاند کو تورکیا و میسر و چین ژی هاریکار بووینە بۆ هندێ ئیران بهێتە سەر مێزا دانوستاندنێ و پاکستان ژی کو سنۆرەکێ نەه سەد کیلۆمەتری د گەل ئیرانێ هەیە رۆڵەکێ گرنگ د دیپلۆماسیێ دا د گێڕیت چونکی تاران باڵیۆزخانە ل واشنتن نینە و پاکستان نوێنەرایەتیا هندەک بەرژەوەندیێن وێ دکەت
ڕۆژنامەنووس لە بادینان دەیلی.
