رێڤەبەریا فرۆکەخانەیا نێڤدەوڵەتیا کەرکووکێ راگەهاند کو هەمی ئامادەکاریێن تەکنیکی و کارگێڕی تەواو بووینە و د بیست و چوار دەمژمێرێن داهاتی دا دێ گەشت ل فرۆکەخانێ دەسپێکەنەڤە
هەردی ساڵەیی رێڤەبەرێ راگەهاندنا فرۆکەخانەیا نێڤدەوڵەتیا کەرکووکێ راگەهاند کو رێکارێن تەکنیکی و کارگێڕی یێن تایبەت ب فرۆکەخانێ ڤە تەنێ د ماوەیا ئێک رۆژ دا دێ ب دوماهی هێن و نوکە ئامادەکاری ب چڕی بەردەوامن بۆ دابینکرنا هەمی پێدڤیاتیان ب مەبەستا ڤەگەرەکا ئارام و رێخستی بۆ جوولەیا فرۆکەڤانیێ
دەربارەی دەمێ گەشتان رێڤەبەرێ راگەهاندنا فرۆکەخانێ ئاماژە ب وێ یەکێ کر کو خشتەیێ گەشتان دێ ئێک ل دویف ئێک ب رێکا کەناڵێن فەرمی هێنە بەلاڤ کرن و داخوازی ژ گەشتیاران و کۆمپانیایێن فرۆکەڤانیێ کر کو چاڤەڕێی دوماهی نووکاریان بن یێن ژ لایێ ئیدارەیا فرۆکەخانێ ڤە دهێنە بەلاڤ کرن
بەنگین رێکانی سەرۆکێ دەسەڵاتا فرۆکەڤانیا سڤیلا عێراقێ ب وەکالەت ئەڤرۆ چارشەمبی ڤەکرنا ئەسمانێ عێراقێ و هەمی فرۆکەخانەیێن عێراقێ و هەرێما کوردستانێ راگەهاند و گۆت ژی کو ئەڤرۆ ئێڤاری گەشتێن ئەسمانی دێ دەسپێکەنەڤە دیسا فرۆکەخانەیێن هەولێر و سلێمانیێ ژی دەست ب ئامادەکاریان کریە بۆ دەسپێکرنا گەشتێن خۆ پشتی کو ژ لایێ بەغدا ڤە هاتینە ئاگەهدار کرن
فرۆکەخانەیێن هەرێما کوردستانێ و عێراقێ پێکهاتینە ژ هەولێر و جەلال تاڵەبانی ل سلێمانیێ و کەرکووک و مووسڵ و بەغدا و نەجەف و بەسرە کو بڕیارە هەمی دەست ب کارێن خۆ بکەنەڤە