دادگەهێ بڕیار دا بیڵ کۆسبی کچەک بێهۆش کرییە و دەستدرێژی کرییە سەر دێ 19 ملیۆن دۆلاران وەک قەرەبوو دەت

بادینان دەیلی:
پشتی پتر ژ نیڤ سەدەیێ، ڕاستی ئاشکرا بوون؛ دادگەهەکێ ل کالیفۆرنیا بیڵ کۆسبی، ئەکتەر و کۆمیدیانێ بناڤودەنگێ ئەمریکی، ب دەستدرێژییا سێکسی تومەتبار کر و بڕیار دا ب کوژمێ 19.25 ملیۆن دۆلاران قەرەبوویا وێ ژنێ بکەت ئەوا دەستدرێژی کرییە سەر.

چیرۆکا تاوانێ پشتی 50 سالان:
“دۆنا مۆتسینگەر” ئەو ژنا کو سکاڵا ل دژی بیڵ کۆسبی تۆمار کری، ل دادگەهێ بەحس ل هندێ کر کو ل سالا 1972ێ وەک گارسۆن ل چێشتخانەیەکێ کار دکر، ل وێ دەمێ کۆسبی بانگهێشت کربوو بۆ نیشاندانا ستاندئاپەکا کۆمیدی یا وی.

بێهۆشکرن و دەستدرێژی:
دۆنا دبێژیت، کۆسبی شەراب و دوو حەب داینە وێ کو وێ هزر دکر بتنێ ئازارشکێنن، بەلێ پاشان بێهۆش بوویە. دەما ل مالا خۆ ب هۆش خۆ هاتییەڤە، دیتییە کو چ جلوبەرگ ل بەر نەبووینە و تێگەهشتییە کو ژ لایێ کۆسبی ڤە هاتییە بێهۆشکرن و دەستدرێژی کرییە سەر.

بڕیارا دادگەهێ:
پشتی دوو حەفتییان ژ دادگەهکرنێ، دەستەیا سویندخواران ل دادگەها “سانتا مۆنیکا” ل کالیفۆرنیا گەهشتە وێ باوەریێ کو کۆسبی ئەڤ تاوانە ئەنجام دایە و پێدڤییە قەرەبوویا زیانڤێکەفتیێ بکەت.

هەلویستێ پارێزەران و تومەتێن دی:
پارێزەرێن کۆسبی نه‌ڕازیبوونا خۆ دیار کر و ڕاگەهاند کو دێ تانێ (ئیعترازێ) ل بڕیارێ دەن، چونکی ب دیتنا وان ئەڤ تومەتە بتنێ ل سەر بنەمایێ گومانێ بووینە. ئەڤ بڕیارا نوو د دەمەکێ دایە کو پتر ژ 60 ژنێن دی ب هەمان شێوە تومەتا دەستدرێژیێ ئاراستەی کۆسبی کرینە، بەلێ وی هەمی تومەت ڕەت کرینە.

بڕیارا قەرەبووکرنا دۆنا ب پتر ژ 19 ملیۆن دۆلاران، جارەکا دی بیڵ کۆسبیێ تەمەن 88 سالی ڤەگەراندە ناڤ باسیێن گەرم یێن میدیایێن جیهانی.