بادینان دەیلی:
حکومەتا رووسیا ب فەرمی بانگهێشتنامەک ئاراستەی قوتابی و لاوێن هەرێما کوردستانێ کریە بۆ پشکداریکردنێ د “فێستیڤاڵا نێودەوڵەتی یا لاوان ٢٠٢٦” دا، کو بڕیارە ل باژارێ (یەکاتێرینبورگ) بهێتە ئەنجامدان.
ئەڤرۆ سێشەمبی، ٣١ـی ئادارا ٢٠٢٦ێ، حکومەتا رووسیا راگەهاند کو ئەڤ فێستیڤاڵا جیهانی دێ ل رێکەفتی ١١ـی ئەیلوولێ دەستپێکەت و تاوەکو ١٧ـی هەمان مەهـ یا بەردەوام بیت. چاڤەڕێ دهێتە کرن پتری ١٠ هزار گەنج ژ ناڤخۆیا رووسیا و ١٩٠ وڵاتێن جودا یێن جیهانێ پشکداریێ تێدا بکەن. گەنجێن هەرێما کوردستانێ ژی، کو سالێن بووری ئامادەبوونا وان هەبوو، ئەڤساڵ ژی دەلیڤەیا پشکداریکردنێ بۆ هاتیە رەخساندن.
ئارمانجێن فێستیڤاڵێ:
فێستیڤاڵ ل سەر چەند تەوەرەکێن گرنگ کار دکەت، ژ وان ژی:
١. دروستکرنا پردێن پەیوەندیێ و تۆڕەکا نێودەوڵەتی د ناڤبەرا سەرکردەیێن گەنج یێن جیهانێ دا.
٢. گوهۆڕینا ئەزموون و هوشمان د بوارێن (کلتوور، زانست، میدیا، وەرزش و بازرگانی) دا.
٣. دانوستاندن ل سەر کێشەیێن جیهانی و هەوڵدان بۆ دیتنا چارەسەریێن هەڤپشک.
تێچوویێ گەشتێ و رێکا پێشکێشکرنێ:
د بانگهێشتنامەیێ دا هاتیە دیارکرن کو وڵاتێ رووسیا هەمی تێچوویێن گەشتێ دێ گریتە ئەستۆیا خۆ. ئارەزوومەند دشێن تاوەکو رێکەفتی ٣٠ـی نیسانا ٢٠٢٦ێ ب رێکا ئۆنلاین داخوازیێن خۆ پێشکێش بکەن و فۆڕما تایبەت ب گەشتکرنێ بۆ رووسیا پڕ بکەنەڤە.
ژێدەر: بادینان دەیلی