بادینان دەیلی:
وەلاتیێن رۆژئاڤایێ کوردستانێ ب توندی سەرکۆنەیا وان هێرشان دکەن یێن کو دهێنە سەر هەرێما کوردستانێ و رادەگەهینن کو ئارمانجا سەرەکی یا ڤان پەلاماران تێکدانا سەقامگیریا دەڤەرێ یە، هەروەسا پشتەڤانییا خۆ یا تەمام بۆ حکومەتا هەرێما کوردستانێ دوپات دکەن.
نەشئەت زازا، ئەندامێ نڤیسینگەها سیاسی یا پارتی دیموکراتی کوردستانی – سووریا (PDK-S) دەربارەی هێرشێن ل سەر هەرێمێ راگەهاند: “ئەڤ کریارە ژ لایێ گروپێن چەکدار یێن سەر ب ئیرانێ ڤە دهێنە ئەنجامدان. مەرەما وان ئەوە کو قەیرانێن خۆ یێن ناڤخۆیی هەناردەی دەرڤە بکەن و ئارامییا هەرێما کوردستانێ تێکبدەن.”
زازای ئاماژە ب وێ چەندێ ژی کر کو هەرێما کوردستانێ نموونەیەکا پێشکەفتی یا پێکڤەژیان و ئارامیێ یە ل سەر ئاستێ عێراقێ، لەوما ئەڤ گروپە بزاڤێ دکەن وێ ئەزموونێ ژ ناڤ ببەن و نەهێلن ئەو دەڤەر ب ئارامی بمینیت.
ل لایەکێ دی، ل سەر جاددەیێن رۆژئاڤایێ کوردستانێ و ب تایبەتی ل باژێرێ قامشلۆ، وەلاتی ب توندی دژی ڤان هێرشان راوەستیان. تەیسیر عەبدولعەزیز، وەلاتیەکێ قامشلۆیە و دبێژیت: “ئەم ب هەمی رەنگەکی ڤان هێرشان رەتدکەین، ب تایبەتی ئەوێن دهێنە سەر هەرێمێ و بارەگایێ بارزانی. ئەم ب دل و گیان ل گەل برایێن خۆ نە ل باشوورێ کوردستانێ.”
هەروەسا یاسین بۆزان، وەلاتیەکێ دی یێ رۆژئاڤا، دیار کر کو دوژمن دڤێن هەرێما کوردستانێ پەلکێشی ناڤ شەڕ و ململانێیان بکەن، لێ حکومەتا هەرێمێ ب ژیری سەرەدەری کریە و راگەهاندیە کو ئەو نیننە بەشەک ژ ڤان ئالۆزیان.
هەروەسا سەربەست بەرفۆ، وەلاتیەکێ دی یێ نیشتەجێێ قامشلۆ، جەخت ل سەر وێ چەندێ کر کو کوردێن رۆژئاوا دێ میننە پشتەڤانێن ب هێز بۆ هەرێما کوردستانێ و ب هەمی شیانێن خۆ ل پاڵ برایێن خۆ د وەستن.
بادینان دەیلی – پشکا نووچەیان