بادینان دەیلی:
سەرۆکایەتییا هەرێما کوردستانێ ڕاگەهاند؛ نێچیرڤان بارزانی، سەرۆکێ هەرێما کوردستانێ، پەیوەندییەکا تەلەفۆنی ژ شێخ محەمەد بن زاید ئال نەهیان، سەرۆکێ دەولەتا ئیماراتا عەرەبی یا ئێکگرتی پێگەهشت.
پەیاما سەرۆکێ ئیماراتێ بۆ نێچیرڤان بارزانی:
د وێ پەیوەندیێ دا، شێخ محەمەد بن زاید ئال نەهیان ب توندی هێرشا درۆنی شەرمەزار کر ئەوا هاتییە کرن بۆ سەر مالا سەرۆک نێچیرڤان بارزانی ل دهۆکێ. هەروەسا پشتەڤانییا بەردەوام یا دەولەتا ئیماراتێ بۆ عێراقێ و هەرێما کوردستانێ و پاراستنا ئاسایش و سەقامگیرییا دەڤەرێ دوپات کر.
بەرسڤا سەرۆکێ هەرێمێ:
ژ ئالیێ خۆ ڤە، نێچیرڤان بارزانی سوپاسییا پەیوەندییا شێخ محەمەد بن زاید ئال نەهیان و هاریکاری و پشتەڤانییا بەردەوام یا دەولەتا ئیماراتێ بۆ هەرێما کوردستانێ و عێراقێ کر.
پێشهاتێن دەڤەرێ و شەڕ:
د تەوەرەکێ دی یێ پەیوەندیێ دا، دوماهیک پێشهاتێن بارودۆخێ دەڤەرێ و لێکەفتێن شەڕی هاتنە بەحسکرن. هەردوو ئالییان جەخت ل سەر گرنگییا هەولێن دیپلۆماسی بۆ بدوماهیک ئینانا شەڕی و جێگیرکرنا تەناهی و ئارامیێ کرەوه.
هەلویستێ وەزارەتا دەرڤە یا ئیماراتێ:
ژ ئالیەکێ دی ڤە، وەزارەتا دەرڤە یا ئیماراتێ د بەیاننامەیەکا فەرمی دا، ئەڤرۆ ئێکشەمبی 29ی ئادارا 2026، ب توندترین شێوە ئەو هێرشە شەرمەزار کر ئەوا ل سەر مالا نێچیرڤان بارزانی ل پارێزگەها دهۆکێ هاتبوو کرن. وەزارەتێ نیگەرانییا خۆ بەرامبەر ڤێ “دەستدرێژییا تاوانکارانە” دیار کر.
د بەیاننامەیێ دا هاتییە کو ئیمارات هەڤسووز و پشتەڤانێ سەرۆک نێچیرڤان بارزانی و خێزانا وی و حکومەتا عێراق و هەرێمێ یە، و ب توندی هەمی جۆرە توندوتیژییەکێ ڕەت دکەت کو ئارمانج ژێ تێکدانا ئاسایش و سەقامگیریێ بیت.