وەزارەتا دەرڤە یا ئیرانێ ب توندی بەرسڤا ئاخفتنێن دۆنالد ترەمپ، سەرۆکێ ئەمریکا دا و راگەهاند کو ئەو تۆمەتێن ل سەر بەرنامێ ئەتۆمی و مووشەکی یێ تارانێ دهێنە گۆتن، بتنێ “پروپاگەندە و درۆن”.
ئیسماعیل بەقایی، پەیڤدارێ وەزارەتا دەرڤە یا ئیرانێ، د پەیامەکێ دا ل سەر تۆرێ جڤاکی یا (X) راگەهاند:
- بەرنامێ ئەتۆمی: ورووژاندنا بابەتا بەرنامێ ئەتۆمی و مووشەکێن بالیستی چ بنەمایەکێ راستیێ بۆ نینە و بتنێ پڕوپاگەندەیا ئەمریکا و ئیسرائیلێ یە.
- ئامارێن زانیاریان: بەقایی ئاماژە ب هندێ کر کو ئەو ئامارێن ترەمپی ل سەر قوربانیێن ئالۆزیێن مەها کانوونا دوێ (مانگی یەک) بەحسکرین، پشکەکن ژ “درۆێن مەزن” یێن واشنتۆنێ.
- جەنگێ دەروونی: تاران واشنتۆنێ تۆمەتبار دکەت کو زانیاریێن شاش بەلاڤ دکەت دا کو جەنگەکێ دەروونی دژی گەلێ ئیرانێ دروست بکەت و سزایێن نێڤدەولەتی رەوا نیشان بدەت.
ئەڤ بەرسڤا ئیرانێ پشتی وێ یەکێ دهێت کو ئەڤرۆ سپێدێ دۆنالد ترەمپ د گۆتارا سالانە یا خۆ دا ل بەردەم کۆنگرێسی راگەهاند: “ئەمریکا ب چو رەنگان رێ نادەت ئیران ببیتە خودانا چەکێ ئەتۆمی” و بۆ جارا ئێکێ ژی تاران تۆمەتبار کر کو کار ل سەر مووشەکێن دوورهاوێژ دکەت دا کو بگەهنە ناڤ خاکی ئەمریکا.