بادینان دەیلی:
ل گۆرەی نووترین پولێنکاریا جیهانی، کەرتی ساخلەمیێ ل عیراقێ د رێزبەندیا وڵاتێن عەرەبی دا ل پلەیا 12ێ دهێت، کو ئەڤە ژی نیشانەکا پاشکەفتنا خزمەتگوزاریێن پزیشکی یە ل ڤی وڵاتی.
د راپۆرتەکا نوو یا مالپەرێ “Numbeo” یێ تایبەت ب پێوەرێ چاڤدێریا ساخلەمیێ، کو ئاستێ خزمەتگوزاریێن پزیشکی ل وڵاتێن جیهانێ دپێڤیت، وڵاتێ قەتەر وەک باشترین وڵاتێ عەرەبی هاتە دەستنیشانکرن و پلەیا ئێکێ وەرگرت، پاشان وڵاتێ ئیمارات ل پلەیا دویێ و ئوردن ل پلەیا سیێ دهێن.
هەر ل گۆرەی وێ رێزبەندیێ، لوبنان و عومان ل پلەیێن چارێ و پێنجێ نە، د دەمەکێ دا هەر ئێک ژ (سعوودیە، کوێت، تونێس، جەزائیر، میسر و مەغریب) د پلەیێن شەشێ هەتا یا 11ێ دا دهێن.
هاتنا عیراقێ د پلەیا دوازدێ دا د ڤێ رێزبەندیێ دا، ئاماژەیەکا روونە بۆ وان کێشە و ئاستەنگێن مەزن یێن هەتا نوکە بەرۆکێ کەرتی ساخلەمیێ ل وی وڵاتی گرتین، ب تایبەتی دەمێ ئەڤ خزمەتگوزاریە ل گەل وڵاتێن جیران و دەڤەرێ دهێنە بەراوردکرن.
مالپەرێ “نۆمبیۆ” بۆ هەلسەنگاندنا کەرتی ساخلەمیێ پشت ب چەند پێوەرێن زانستی و مەیدانی دبەستیت، ژ گرنگترین وان ژی: کوالیتیا خزمەتگوزاریێن پزیشکی، شارەزایی و کارامەییا کارمەند و پزیشکان، خێریا پێشکێشکرنا چارەسەریێ بۆ نەخۆشان، ل گەل ئاستێ پێشکەفتنا ژێرخانا ساخلەمیێ و ئاڤاهیێن نەخۆشخانەیان.
بادینان دەیلی – پشکا نووچەیان