بەرەڤانییا باژێڕى یا ئاکرێ هشیاریێ ددەتە وەلاتیێن قەزایێن ئاکرێ، بەردەرەش، تلکێف و مێرگەسۆر لسەر پێلەکا بهێز یا باران بارینێ کو پێشبینی دهێتەکرن ئەڤ شەڤە دەڤەرێ بگریت.
ل گورەی پێشبینیێن سەقاناسییا پارێزگەها دهۆکێ، ئەڤ شەڤە دێ بارانەکا دژوار ل سنورێ پارێزگەهێ بارت و ب تایبەت ل قەزایێن ئاکرێ و بجیل دێ بارانێن بۆش بن. ژبەر ڤێ یەکێ، بەرەڤانییا باژێڕى داخوازێ ژ وەلاتیان دکەت کو ب پێتڤی نەبیت ئەڤ شەڤە ژ مالێن خۆ دەرنەکەڤن دا کو پاراستی بن.
رێنمایێن خۆپاراستنێ:
بۆ پاراستنا گیان و سەلامەتییا خۆ و خێزانێن هەوە، هیڤی یە پێگیریێ ب ڤان رێنمایان بکەن:
• جهێن چیایی: هشیار بن ژ ئەگەرێ هاتنەخوارا بەرد و کەڤران ل دەڤەرێن چیایی.
• دەرکەفتنا ژ مال: ئەگەر کارەکێ گەلەک پێدڤی نەبیت، ل مال بمینن و خۆ ژ هاتن و چوونێن نەپێتڤی بپارێزن.
• ئاڤا کومبووی: ب چ رەنگەکێ ب ترومبێلێن خۆ د ناڤ وان جهانرا دەرباز نەبن یێن ئاڤ لێ کومبووی.
• مالێن نێزیک دۆل و نهالان: پێدڤی یە رێکێن رزگاربوونێ هەبن ل دەما بلندبوونا ئاستێ ئاڤێ.
• پاراستنا ئاژەلان: جهێن خودانکرنا ئاژەل و پەلەوەران بلا دویر بن ژ ئاڤرێژ و جهێن نزم.
• کارەب و ئاڤ: ل دەمێ ئاڤ دچیتە د ناڤ مالان دا، سەرەکیترین کار بڕینا هێلا کارەبێ یە و چوونا بلندترین جهـە ل ناڤ مالێ.
• هژمارا فریاکەفتنێ: بۆ هەر روودانەکا نەچاڤەرێکری، راستەوخۆ پەیوەندیێ ب هژمارا فریاکەفتنێ 115 بکەن.
تیمێن بەرەڤانییا باژێڕى ل هەردوو دەڤەرداریێن ئاکرێ و بەردەرەش د ئامادەباشیەکا تەمام دانە و بۆ ماوێ 24 دەمژمێران دێ بەرهەڤ بن بۆ هەر روودانەکێ.