پشتی ئاگربەستا جەنگێ ئێرانێ و ئاساییبوونا ڕەوشا گەشتێن ئاسمانی ل ناڤەراستا مەها بووری و تا نوکە پتر ژ 750 گەشت ل فڕۆکەخانەیا نێڤدەولەتییا هەولێرێ هاتینە ئەنجامدان و چەند هێلەکێن ئاسمانی ژی هێشتا گەشتێن خۆ دەستپێنەکرینەڤە
ئەحمەد وشیار ڕێڤەبەرێ گشتی یێ فڕۆکەخانەیا نێڤدەولەتییا هەولێرێ ئەڤرۆ ئێکشەمبی ڕێکەفتی 17ێ گولانا 2026ێ تایبەت بۆ مالپەرێ بادینان دەیلی ڕاگەهاند کو پشتی جەنگێ ئێرانێ و ژ دەما گەشتێن ئاسمانی ل هەرێما کوردستانێ و دەڤەرێ ئاسایی بووینەڤە 758 گەشتێن هاتن و چوونێ ل فڕۆکەخانەیا هەولێرێ هاتینە ئەنجامدان
ناڤبری دیار کر کو گەشتێن ئاسمانی دناڤبەرا هەولێرێ و چەندین وەلات و باژێران ب تەمامی ئاسایی بوونە وەک قەتەر و ئیستانبوڵ و ئەنقەرە و دوبەی و شارقە و لوبنان و سووریا و عەممان و ئێران و ئەلمانیا و میسر هەروەسا گەشتێن ناڤخۆیی بۆ فڕۆکەخانەیێن بەغدا و بەسرە ژی ب شێوەیەکێ ئاسایی بەردەوامن
د هەمان دەم دا ئاماژە ب وێ یەکێ کر کو چەند هێلەکێن ئاسمانی هێشتا گەشتێن خۆ دەستپێنەکرینەڤە ژ وان ژی یورۆ وینگزا ئەلمانی و ئۆستریان ئەیرلاینز یا نەمساوی و هێلا ئاسمانی یا یۆنانی و دەربارەی ئەگەرێ گیرۆبوونا وان ژی گۆت کو تا نوکە چو زانیاریێن نوی یان ژڤانەکێ دیارکری بۆ دەستپێکرنێ نەگەهشتینە مە
ئەڤ پێنگاڤە پشتی وێ یەکێ دهێت کو ل 28ێ شواتا بووری ژبەر ململانێیێن سەربازی دناڤبەرا ئەمریکا و ئیسرائیلێ ل هەمبەر ئێرانێ ئاسمانێ عێراقێ بۆ هێرشێن ل سەر ئێک هاتبوو بکارئینان و ب وێ ئەگەرێ ژی بۆ پاراستنا گیانێ گەشتیاران هەمی گەشت هاتبوونە ڕاگرتن کو ئەو شەڕە پتر ژ 38 ڕۆژان بەردەوام ببوو
فڕۆکەخانەیا نێڤدەولەتییا هەولێرێ کو ئێکە ژ گرنگترین فڕۆکەخانەیێن دەڤەرێ درێژاهیا فڕگەها وێ 4800 مەترە و د ڕێزبەندا 10 درێژترین فڕگەهێن جیهانێ دایە و شیانێن خزمەتکرنا 4 ملیۆن و نیڤ گەشتیاران ل سالەکێ دا هەیە و تا نوکە خزمەتا 18 ملیۆن گەشتیاران کریە ب ڕێکا 20 هێلێن ئاسمانی یێن جودا بۆ پتر ژ 270 جهان ل سەرانسەری جیهانێ