سەرپەرشتیارێ ئیدارا سەربەخۆ یا زاخۆ راگەهاند کو پتر ژ دەه هزار پارچە زەڤی بۆ بەلاڤکرنێ ل سەر فەرمانبەران هاتینە ئامادەکرن و سەرەتایا حەفتیا بهێت پڕۆسەیا تیرۆپشکێ دێ دەست پێ کەت
ئەڤرۆ رۆژا یەکشەمبی گوهدار شێخۆ سەرپەرشتیارێ ئیدارا سەربەخۆ یا زاخۆ د کۆنفرانسەکێ رۆژنامەڤانی دا دیار کر کو پتر ژ پێنج هزار پارچە زەڤی ل قۆناغێن چوویدا هاتینە بەلاڤکرن و ل ڤێ قۆناغێ ژی ئەو فەرمانبەرێن هەشت سالێن خزمەتێ هەین دێ زەڤی پێ هێنە دان
ناڤبری ئاماژە ب وێ یەکێ ژی کر کو شارەوانیێن زاخۆ ناڤێن پتر ژ سێزدە هزار فەرمانبەران رەوانە کرینە و پشتی وردبینیێ پتر ژ دەه هزار پارچە زەڤی هاتینە ئامادەکرن و هەر فەرمانبەرەکێ بەری نوکە مفادار بوبیت مافێ وەرگرتنا زەڤیێ نامینیت
گوهدار شێخۆ گۆت ژی پڕۆسەیا تیرۆپشکێ ل دەستپێکا حەفتیا بهێت دێ دەست پێ کەت و ل دویف رێڤەبەرییان دێ هێتە رێکخستن و قۆناغا ئێکێ ژی دێ ژ فەرمانبەرێن چاندنێ دەست پێ کەت و پڕۆسە دێ چوار بۆ شەش هەیڤان کێشیت لێ پشتراستیێ ددەت کو چو فەرمانبەرێن شایستە بێ زەڤی نامینن
د پشکەکا دی یا ئاخفتنێن خۆ دا سەرپەرشتیارێ ئیدارا سەربەخۆ بەحسێ وێ یەکێ کر کو لیژنەکا تایبەت هاتیە پێکئینان بۆ قەرەبووکرنا وان وەلاتی و جۆتیارێن زەڤیێن وان د ڤێ پڕۆسێ دا هاتینە بکارهینان و قەرەبووکرن ژی دێ ب شێوێ زەڤی یان پارە یان مولک بیت و بۆ ڤێ مەرەمێ هەمی رێکارێن پێدڤی هاتینە وەرگرتن
ئەڤ پێنگاڤا ئیدارا سەربەخۆ یا زاخۆ د چارچۆڤێ بڕیارا جڤاتا وەزیرێن هەرێما کوردستانێ دایە بۆ پێدانا زەڤیێ ب وان فەرمانبەرێن پتر ژ هەشت سالێن خزمەتێ هەین و بەری نوکە ژ وەرگرتنا زەڤی یان یەکەیێن ئاکنجیبوونێ مفادار نەبووینە
بادینان دەیلی