پشتی 14 رۆژێن ئاگربەستێ جارەکا دی ترس و دڵەڕاوکێ کەفتیە ناڤ کولانێن ئیرانێ د دەمەکێ دا بڕیارە شاندێن تاران و واشنتن ل پاکستان کۆم ببن سەرۆکێ ئەمریکا هۆشداریێ ددەتە ئیرانێ و گەفێن ژ ناڤبرنا ژێرخانا وی وەلاتی دکەت ئەگەر مەرجێن وان قەبوول نەکەن
دوو حەفتیێن ئاگربەستا د ناڤبەرا ئیران و ئەمریکا دا دەرفەتەک بوو دا کو ژیان ل تاران و باژێرێن دی یێن ئیرانێ تا رادەیەکی ئاسایی ببیتەڤە ل دویماهی رۆژێن ڤێ مۆهلەتێ دا وەلاتیێن ئیرانێ نیگەرانن ژ بێئەنجامبوونا دانوستاندن و دەستپێکرنا جەنگی
بابەک سەمیعی ئەندازیار ئاماژە ب وێ یەکێ کر کو بزاڤ کریە ب گۆری شیانێن خوە ڤەگەریتە سەر رۆتینا جاران یا ژیانا خوە و گۆت د ماوەیێ 40 رۆژێن جەنگی دا وان نەشیا چ کاران بکەن و ئەو دبینیت دانوستاندن دێ بەردەوام بن و رەنگە ئاگربەست بهێتە درێژکرن لێ ل دویماهیێ ناگەهنە رێککەفتنێ و جەنگ دێ دەستپێ کەتەڤە
د بەرامبەر دا پشکەک ژ وەلاتیان د رژدن ل سەر وێ یەکێ کو نابیت وەلاتێ وان سەرێ خوە بۆ داخوازێن ئەمریکا بچەمینیت و دبینن ب بێ رێککەفتن ژی جەنگ روو نادەت
رەزا شیری کاسبکار راگەهاند وەک ئیرانیەک وەلاتێ خوە خۆش دڤێت و دبینیت داخوازێن ئەمریکا گەلەک ب زەحمەتن و گۆت واشنتن دڤێت هەمی تشتان رادەست بکەین و یۆرانیۆم و پاشکەفتێن مە ببەن و ئەو ب چ رەنگان ڤێ یەکێ ناکەن و باوەر ژی ناکەت جەنگ دەستپێ بکەتەڤە چونکی تێچوویێ وێ بۆ هەر دوو لایان یێ گرانە
بڕیارە ل دویماهی رۆژا مۆهلەتا 14 رۆژی یا ئاگربەستێ شاندێن ئیران و ئەمریکا جارەکا دی ل پاکستان کۆم ببن پشتی کو ل دویماهیا مەها شوباتێ یا سالا 2026 دانوستاندنێن ئەتۆمی شکەستن ئینای و جەنگەکێ مەزن د ناڤبەرا واشنتن و تاران دا دەستپێکری
پشتی نێزیکی دوو مەهان ژ هەڤرکی و بۆردومانێن سەربازی ل رۆژا 8 نیسانێ 2026 ب ناڤندگیرییا وەلاتێ پاکستان هەردوو لایان ئاگربەستەک بۆ 14 رۆژان راگەهاند نوکە ژی دگەل نێزیکبوونا ب دووماهی هاتنا وێ دۆناڵد ترەمپ سەرۆکێ ئەمریکا هۆشداری دایە تاران ئەگەر مەرجێن دەستبەرداربوون ژ بەرنامێ ئەتۆمی و رێککەفتنەکا نوو قەبوول نەکەن دێ هێرش دەستپێ کەنەڤە و تەڤایا ژێرخانا وزێ و پرا یێن ئیرانێ ژ ناڤ ببەن
ل لایێ دی بەرپرسێن ئیرانی هەتا نوکە بەرهەڤیا تمامی بۆ قەبوولکرنا داخوازان نیشان نەدایە و ئەڤێ یەکێ ژی دڵەڕاوکێیەکا مەزن ل دەڤ وەلاتیان دروست کریە دەربارەی سەرهەلدانەڤەیا جەنگەکێ دی یێ مالوێرانکەر ل دەڤەرێ دا