کەشو هەوا بەرە بەرە بەرەڤ گەرمبوونێ دچیت و گەرما ژی ئێکە ژ وەرزێن گونجای بۆ بەلاڤبوونا تایا خوینبەربوونێ رێڤەبەرێ ڤێتێرنەرییا دهۆکێ رادگەهینیت کو هەمی دەمان ئەڤ نەخۆشییە د ناڤ ئاژەلان دا هەیە و پێدڤیە هاوەلاتی وشیار بن د سەرەدەرییا درست دا ل گەل ئاژەلی و گوشت و بەرهەمێن وی
ئەڤرۆ ئێکشەمبی ١٩ێ نیسانا ٢٠٢٦ێ دکتۆر نیشتمان عارف رێڤەبەرێ ڤێتێرنەرییا دهۆکێ راگەهاند کو رێڤەبەریا وان ب هەمی تەخ و چینێن جودا یێن ئاژەلداریێ دگەهیت دا کو وشیار ببن ل سەر چەوانیا سەرەدەریا درست ل گەل نەخۆشیێن هەڤپشک د ناڤبەرا مرۆڤ و ئاژەلان دا
ل دویڤ ڤێتێرنەرییا پارێزگەها زیقار د چەند رۆژێن دەربازبووی دا ٩ کەس تووشی تایا خوینبەربوونێ بووینە و دوو ژ وان گیانێ خوە ژ دەست دایە دکتۆر نیشتمان عارف ل دۆر نەخۆشیێ جەخت ل سەر وێ یەکێ کر کو هەمی دەمان پێدڤیە پابەندی هەبیت ب هەلبژارتنا گوشتێ گونجای و رێپێدای پاشان ژی دویرکەفتن ژ وان جهان یێن کو ئاژەل لێ هەین یان ئاژەل تێدا دمینن ب تایبەت د دەمێ گەشت و سەیرانان دا
چەوان سەرەدەریێ ل گەل ئاژەلی دکەی
وان ئاژەلان هەلبژێرە یێن کو گەنە و مێش و مەگەز پێڤە نینن
د دەمێ سەربرینێ دا دویرکەڤە ژ وی جهی و بلا چ بەرکەفتنا تە ل گەل گوشتی و پاشمایێن ئاژەلی نەبیت
بەری سەربرینێ و پشتی سەربرینێ پشکنین بۆ ئاژەلی بهێتە کرن
دەمێ گوشتی دبیە مال
ب دەستکێش و جلوبەرگێن تایبەت گوشت پارچە پارچە بکە
ئەو چەقۆیێ دهێتە بکارهینان باشترە بهێتە هاڤێتن یان ژی پشتی کاری ب فاست بهێتە شویشتن
هەمی خوین و پاشمایە بخرێنە ناڤ کیسکەکان و ل جهێن تایبەت بهێنە هاڤێتن
د دەمێ بەرکەفتنا ل گەل گوشتی دەستێن خوە ب شۆ و دەستان نەبەرە دەڤ و لۆتێن خوە
دەمێ گوشتی دکری و دبیە مال
راستەوخۆ بکە ناڤ بەفرگرێ بۆ ماوێ ٢٤ دەمژمێران
پاشان بکە ناڤ سارکەرەوەیێ دا کو خاڤ ببیتەڤە
چەند دەمژمێرەکان بکوڵینە یان ژی بکە کەباب و ببرژینە ئاساییە