ژ لایێ ڕێڤەبەریا سینەمایا هەولێرێ ڤە، وەرزی بهارێ یێ پڕۆژەیێ “سینەما و جەماوەر” ل هەولێرێ ل ئێمپایەر سینەما دەستپێدکەت.
سێشەمبی، ١٤ێ نیسانا ٢٠٢٦ێ، شاخەوان مستەفا، ڕێڤەبەرێ سینەمایا هەولێرێ بۆ کوردستان ٢٤ ڕاگەهاند: “د ڤێ حەفتیێ دا دێ دەست ب چالاکییێن پڕۆژەیێ ‘سینەما و جەماوەر’ کەینەڤە. ڕاوەستاندنا پڕۆژەی ب ئەگەرێ مەها ڕەمەزانا پیرۆز و پاشان ژی ب ئەگەرێ وان شەڕ و ئالۆزیێن د دەڤەرێ دا دروستبووین بوو، لەوما مە نەشیا بەردەوامیێ بدەینە چالاکییان. نوکە مە بڕیار دایە کو وەرزی بهارێ یێ پڕۆژەیێ سینەما و جەماوەر د ڤێ حەفتیێ دا وەک ئێکەم چالاکی دەستپێبکەین و دێ بەردەوام بین.”
شاخەوان مستەفای گۆتژی: “چالاکیا ڤێ حەفتیا مە، نیشاندانا فلمێ سینەمایی یێ ب ناڤێ ‘سیمای خۆڵەمێش’ (دیمەنێ خولیێ) یە، کو ژ دەرهێنانا شاخەوان ئیدریسە و کۆمەکا هونەرمەندێن ئەستێرە و دیارێن کوردستانێ تێدا دکەنە ئەکتەر. چیرۆکا فلمی ژی بەحسێ سالێن هەشتێیان دکەت، دەما ڕژێما بەعس بوویە ئەگەرێ مالوێرانی و دەربەدەریێ بۆ مللەتێ کورد، کو چو جارەکێ دلخۆشیا کوردی نەڤیایە و بەردەوام کورد ئاوارە و ئەنفال و جینۆسایدکرینە.”
ڕێڤەبەرێ سینەمایا هەولێرێ ئاماژە ب وێ یەکێ ژی کر: “ئەم ب باش دزانین ئەڤ جۆرە فلمە هەبن، چونکی دەرگەهێ مە بۆ هەمی تەخ و چینان یێ ڤەکرییە، چ کورد بن یان ژ نەتەوەیەکێ دی بن، چونکی پەیاما کوردستانێ پەیاما پێکڤەژیانێ یە. لەوما هەر پێکهاتەیەکا کو هونەرمەند بن، دشێن ئەگەر پڕۆژەیێن هونەری هەبن ب تایبەت د بوارێ فلمی دا، ئەم دەرگەهی بۆ وان ڤەکەن و خزمەتا وان بکەین، هەر وەک چەوا خزمەتا هەر تاکەکێ دی دکەین.”
ڕێڤەبەریا سینەمایا هەولێرێ، د چارچۆڤەیێ پڕۆژەیێ “سینەما و جەماوەر” دا، بڕیارە ڕۆژا چارشەمبی ١٥ێ نیسانا ٢٠٢٦ێ دەست ب چالاکییێن خۆ بکەت، هەروەسا هەر حەفتی بێبەرامبەر، فلمێن سینەمایی ل هەولێرێ ل ئێمپایەر سینەما دێ نیشان دەت.