ئەڤرۆ ئەم یادا ب ئێش یا ٣٨ سالیا شالاوێن بەدناڤێن ئەنفالا ١٩٨٨ێ دکەین. ئەو تاوانا دلتەزین یا ڕژێما بەعس ئەنجام دای کو پتر ژ ١٨٢ هەزار زارۆک، ژن، پیاو و گەنجێن بێگونەهێن کوردستانێ تێدا بوونە قوربانی. ئەنفال تەنێ تاوانەک نەبوو، بەلکو هەولەکا بێئەنجام بوو بۆ ژناڤبرنا تەمامیا گەلەکێ ئاشتیخواز کو برینێن وێ هەتا نوکە ژی ل سەر جەستەیێ نیشتمانی ماينە.
د ڤێ یادێ دا، سەرێ ڕێز و نەوازشێ بۆ گیانێ پاقژێ شەهیدان دچەمینین و سلاڤێن وەفاداریێ بۆ بنەماڵە و کەسوکارێن وان یێن خۆڕاگر دهنێرین. ل دویف بڕیارا دادگەها بلندا تاوانێن عیراقێ، دوپات دکەین کو بەرپرسیارەتیا حکومەتا فیدراڵی یا عیراقێ یە قەرەبوویا مادی و مەعنەویا کەسوکارێن قوربانیان بکەت.
ل سەر ئاستێ نێڤدەولەتی، د هەولێن خوە دا د بەردەوام بین دا کو ئەنفال وەک جینۆساید بهێتە ناساندن. وەک ئەرکەکێ مرۆڤی و نیشتمانی، د پرۆسەیا لێگەڕیان و ڤەگێڕانا رووفاتێن پیرۆزێن شەهیدان بۆ باوەشێ نیشتمانی دا چ کێماتیان ناکەین و هەرچی د شیان دا بیت دڤێت خزمەتا پتر ب کەسوکارێن ئەنفالکریان بهێتە کرن.
د ڤێ یادێ دا، جەخت دکەینەڤە کو پاراستنا قەوارەیێ دەستووریێ هەرێما کوردستانێ و دەستکەفتیێن مە، تەنێ ب تەبایی و کارێ هەڤپشکێ هەمی ئالیێن سیاسی و پێکهاتان دبیت. ئەڤە مەزنترین وەفادارییە بۆ خوینا شەهیدان و گەرەنتییا پاشەرۆژەکا باشترە بۆ نەوەیێن مە کو ب ئومێد ڤە لێ دنێرین.
سلاو و دروود بۆ گیانێ پاقژێ شەهیدێن ئەنفالێ و هەمی شەهیدێن کوردستانێ.
نێچیرڤان بارزانی
سەرۆکێ هەرێما کوردستانێ
١٤-٠٤-٢٠٢٦