بادینان دایلی:
دەستەیا پەخشا ئیسرائیلی ئاشکرا دکەت کو ئاگربەستا ئەمریکا و ئیرانێ دێ هێتە درێژکرن و ئەڤ چەندە ژی ب مەرەما دانا دەلیڤەکا زێدەترە دا کو هەردوو لایەن بگەهنە ئەنجامەکێ دووماهیێ
ژێدەرەکێ بلند یێ وی وڵاتی ئاماژە ب هندێ کریە کو ئەگەرەکێ گەلەک ب هێز هەیە ئاگربەستا دوو حەفتیان یا ناڤبەرا ئەمریکا و ئیرانێ بهێتە درێژکرن دا کو دەمێ دانوستانان پتر بیت و ئەو سەرچاوە دبێژیت ئەگەر هەردوو لایەن ل سەر پرسا یۆرانیۆما پیتاندی رێکبکەڤن دێ رێککەفتن ل سەر پرسێن دی یا ب ساناهی بیت چونکو یۆرانیۆم خالا سەرەکی یا ناکۆکیانە و شاندا ئەمریکا بەری پاکستانێ بجه بهێلیت رەشنووسەکێ رێککەفتنێ بۆ ئیرانێ هێلایه
ئەڤرۆ ئێکشەمبی 12 نیسانا 2026 جەی دی ڤانس د کۆنگرەیەکێ رۆژنامەڤانی دا ل ئیسلام ئاباد راگەهاند کو شاندێن واشنتن و تاران بۆ ماوێ 21 دەمژمێران گۆتوبێژ کرینە بەلێ نەگەهشتینە رێککەفتنەکا وەسا کو هەردوو لایەن ل سەر رازی بن و ڤانسی دیار کر کو وان وەک لایەنێ ئەمریکی باشترین پێشنیار پێشکێشی ئیرانێ کرینە بەلێ وان رەتکرینە و ئاشکرا ژی کر کو ئیرانێ بەلێنا راگرتنا بەرنامەیێ خۆ یێ ئەتۆمی نەدایە و چو پابەندیەکا دڵنیامان ژ وان نەبهێستیە
ژ لایەکێ دی ڤە میدیایێن فەرمی یێن ئیرانێ بەلاڤکرینە کو چاڤچنۆکیا ئەمریکا رێگر بوویە ل هەمبەر گەهشتنا هەردوو لایەنان ب رێککەفتنەکێ و ژێدەرەکێ نێزیک ژ تیما دانوستانکار یا ئیرانێ راگەهاند کو ئیرانێ چو پلان بۆ خولا بهێت یا دانوستانان نینە و تیما ئەمریکا ب هندێ تۆهمەتبار کر کو تەنێ ل بیانوویەکێ دگەڕیان دا کو مێزا دانوستانان بجه بهێلن و ئامادە نەبوون داخوازیێن خۆ کێم بکەن
هەروەسا ژێدەرەکێ پاکستانی یێ ئاگەهدار کو چاڤدێریا کۆبوونەڤان دکر رەوشا گۆتوبێژان ب پر ژ گرژی و هەلبەز و دابەز وەسف کر و گۆت کەشێ کۆبوونەڤان د ناڤبەرا توندی و ئارامیێ دا بوو هەتا کو ل دووماهیێ شاندا ئەمریکی بێی رێککەفتن کۆتایی ب دیدارێن خۆ ئینا و بەرەو واشنتن ڤەگەڕیان