ئەنجوومەنێ ئاسایشا نیشتمانیا تورکیا ب سەرۆکایەتیا رەجەب تەیب ئەردۆغان کۆم دبیت و پرۆسەیا چارەسەرکرنا پرسا کورد و هێرشا دوهێ یا ئیستەنبووڵێ و شەری ئەمریکا و ئیسرائیلێ د گەل ئیرانێ ژ تەوەرێن سەرەکی یێن کۆمبوونێ نە
ئەڤ کۆمبوونە دەمژمێر سێی ئێڤاریا ئەڤرۆ چارشەمبی ل کۆشکا سەرۆکایەتیا کۆمارێ ل ئەنقەرە دهێتە ئەنجام دان و ل دویف میدیایێن تورکیا د کۆمبوونێ دا لێکۆڵین ل سەر هێرشا دوهێ یا ئیستەنبووڵێ دهێنە نرخاندن و دوماهی پێشهاتێن شەری ئەمریکا و ئیسرائیلێ د گەل ئیرانێ و ئەو پێوەندیێن دیپلۆماسی یێن تورکیا بۆ چارەسەرکرنا کێشەیێن دەڤەرێ ئەنجام ددەت دێ هێنە گۆتۆبێژ کرن
د کۆمبوونێ دا تیشک دێ هێتە ئێخستنە سەر بزاڤێن تورکیا بۆ رێگریکرنێ ژ بەرفەرهبوونا شەری ل دەڤەرێ و پێوەندیێن د گەل بەرپرسێن ئەمریکی و ئیرانی هەروەسا بابەتەکێ دی یێ کۆمبوونێ شەری ناڤبەرا رووسیا و ئۆکراینایە کو سەرۆکێ تورکیا پێشتر د گەل سەرۆکێن هەردو وڵاتان کۆم ببوو و نوکە پێداچوونێ د پێوەندیان دا دکەن بۆ دەسپێکرنا پرۆسەیەکا نوو ل ئیستەنبووڵێ
پرۆسەیا چارەسەرکرنا پرسا کورد ل تورکیا کو ب ناڤێ تورکیایا بێ تیرۆر دهێتە ناسین و ساڵ و نیڤە ئەڤ پرۆسەیا بەردەوامە د کارنامەیا کۆمبوونێ دایە و پێشهاتێن مەیدانی دێ ب وردی هێنە نرخاندن دیسا ل سەر بنەمایێ زانیاریێن یەکەیێن هەواڵگری و ئەمنی پێشهاتێن رۆژئاڤایێ کوردستانێ و باکورێ سووریا و پرۆسەیا ئێکخستنا هەسەدە د گەل حکومەتا مەڵبەندیا سووریا دێ هێنە نرخاندن