د ماوێ سیه و نەه رۆژێن شەری دا د ناڤبەرا ئەمریکا و ئیسرائیل د گەل ئیرانێ دا زیانێن مەزن یێن گیانی و ماددی گەهشتینە هەر سێ وڵاتان کو ل ئیرانێ کوشتی و زیانێن ژێرخانی زۆرترن و ل ئەمریکا ژی تێچوویێ شەری گەلەک یێ بلند بووی و ب ملیاران دۆلار ل سەر واشنتن کێم بووینە
شارەزایێن سەربازی یێن ئەمریکی دبێژن ئەڤ شەرە رۆژانە زێدەتر ژ پێنج سەد ملیۆن دۆلاران ل سەر ئەمریکا دکەڤیت و تێچوویێ گشتی د پێنج هەفتیێن دەستپێکێ دا گەهشتیە د ناڤبەرا بیست و دوو بۆ سیه و ئێک ملیار دۆلاران دیسا سێزدە سەرباز و وەلاتیێن ئەمریکی هاتینە کوشتن و زێدەتر ژ سێ سەد کەسان بریندار بووینە و زیانێن مەزن گەهشتینە کەشتیێن فرۆکەهەلگر و سیستمێن راداری و فرۆکەیێن جەنگی یێن پێشکەفتی
ئەمریکا د ڤی شەری دا هەشت سەد و پەنجی مووشەکێن تۆماهۆک یێن مەودا دوور ئاراستەی ئیرانێ کرینە کو ئەڤ ژمارەیە ژ شەری عێراقێ یێ ساڵا دوو هزار و سێ ژی پترە و چەندین فرۆکەیێن ژ جۆرێ ئێف پازدە و درۆنێن پێشکەفتی یێن ئەمریکی هاتینە خوارێ یان زیانێن مەزن گەهشتینێ
نەتەوەیێن ئێکگرتی ئاشکەرا کر کو تەنێ د ئێک هەیڤ دا زێدەتر ژ دوو هزار و سەد هاووڵاتیێن مەدەنی ل ئیرانێ هاتینە کوشتن و زێدەتر ژ بیست و حەفت هزار کەسان بریندار بووینە و سێ ملیۆن و هەشت سەد هزار کەس ژی ب ئەگەرێ ڤی شەری زیان پێ گەهشتیە و هەروەسا حەفت سەد و شەست و سێ قوتابخانە و سەد و پانزە ژێرخانێن سڤیل و سەد و بیست هزار خانی و دۆکان و شوقە زیان پێ گەهشتیە
ل دویف راپۆرتێن هەواڵگری یێن ئەمریکی واشنتن شیایە سێیەکا جبەخانەیا مووشەکی و درۆنێن ئیرانێ ژ ناڤ ببەت و نۆت و دوو ژ سەدێ یێن کەشتیێن جەنگی یێن مەزن یێن ئیرانێ نوقم کرینە و زێدەتر ژ دەه هزار پێگەهێن سەربازی یێن ئیرانی هاتینە ئارمانج کرن دیسا دەربارەی دۆسیەیا ئەتۆمی دۆناڵد ترەمپ راگەهاند کو ئەو بابەتە چیدی جهێ نیگەرانیێ نینە چونکی ئەم ب رێکا مانگێن دەستکرد چاڤدێریێ دکەین و کێشە هاتیە چارەسەر کرن
ل رۆژا سیه و نەهێ یا شەری ئەمریکا و ئیسرائیلێ زێدەتر ئارمانج ل سەر پرد و هێڵێن ئاسنی یێن ستراتیژی بوو ل باژێرێن تاران و تەورێز و ئەلبورز و زەنجان و ئەسفەهان و باژێرێن باشووری ئیرانێ کو ب وێ ئەگەرێ هێڵێن شەمەندەفەرێ پەککەفتینە و کارەبا چەندین دەڤەران هاتیە برین و ژمارەیەکا دی یا خەلکی ژی بووینە قوربانی و حکومەتا ئیرانێ ژی بڕیار دایە هاریکاریا دارایی پێشکێشی وان خێزانان بکەت یێن خانیێن وان تێکچووینە