دەسەڵاتا فرۆکەڤانیا سڤیلا عێراقێ بڕیارا ڤەکرنا ئەسمانێ وەڵاتی ب روویێ گەشتێن ئەسمانی دا دا و رێڤەبەرێ فرۆکەخانەیا نێڤدەولەتیا هەولێرێ ژی راگەهاند کو وان دەست ب ئامادەکاریان کریە بۆ دەسپێکرنا گەشتان
ئەحمەد هۆشیار رێڤەبەرێ فرۆکەخانەیا هەولێرێ راگەهاند کو ژ لایێ دەسەڵاتا فرۆکەڤانیا سڤیلا عێراقێ ڤە هاتینە ئاگەهدار کرن بۆ دەسپێکرنا گەشتێن ئەسمانی و نوکە یێ د ئامادەکاریان دانە
ژ لایێ خۆ ڤە فرۆکەخانەیا نێڤدەولەتیا جەلال تاڵەبانی ل سلێمانیێ د راگەهاندنەکێ دا ئاماژە ب وێ یەکێ کر کو ل دویف ئاگەهداریا وان ژ بەغدا بۆ هاتی ل ئەڤرۆ رێکەفتی هەشتی نیسانا دوو هزار و بیست و شەش ئەسمانێ عێراقێ ب روویێ جوولەیا فرۆکەڤانیێ دا هاتە ڤەکرن
بڕیارە هێڵێن ئەسمانی ل دویف پلانا خۆ و پشتی رێخستنا خشتەیێن گەشتان ب زووترین دەم دەست ب گەشتێن خۆ ل فرۆکەخانێ بکەنەڤە
بەنگین رێکانی سەرۆکێ دەسەڵاتا فرۆکەڤانیا سڤیلا عێراقێ ب وەکالەت راگەهاند کو ئەڤرۆ چارشەمبی ئەسمانێ عێراقێ و هەمی فرۆکەخانەیێن هەرێما کوردستانێ و عێراقێ هاتنە ڤەکرن و گۆت ژی کو ئەڤرۆ ئێڤاری گەشتێن ئەسمانی دێ دەسپێدەکەنەڤە
ئەو فرۆکەخانەیێن دێ گەشت لێ دەسپێکەنەڤە پێکهاتینە ژ هەولێر و سلێمانی و کەرکووک و مووسڵ و بەغدا و نەجەف و بەسرە و بەرپرسێن فڕۆکەڤانیێ ژی ئەڤ یەکە بۆ دەزگەهێن راگەهاندنێ پشت راست کریە