بادینان دەیلی:
رێڤەبەریا گشتی یا کاروبارێن مینان ل پارێزگەها دهۆکێ هۆشداریێ ددەتە وەلاتیان کو ژ ئەگەرێ بارانێن ب هێز و لافاوێن دووماهیێ، جهێ مینان هاتیە گوهۆڕین و ل هندەک جهان ژ ژێر ئاخێ دەرکەفتینە. ژبۆ روو ب روو بوونا هەر رووداوەکا نەخوازراو ژی، تیمێن ب هەناوەچوونێ د حالەتێ ئامادەباشیێ دانە.
تیمێن ب هەناوەچوونێ ل رێڤەبەریا گشتی یا کاروبارێن مینان ل دهۆکێ، ب شەڤ و رۆژ د ئامادەباشییا تەمام دانە بۆ پاراستنا گیانێ وەلاتیان. ل گەل بارینا بارانێن زۆر، ئەرک و بەرپرسیارەتیا ڤان تیمان گرانتر لێ دهێت، دا کو ب زوترین دەم بگەهنە هەر جهەکێ مەترسی ل سەر بیت.
دلۆڤان شەوکەت، ئەندامێ تیمێ تەقاندنا مینان بۆ “کوردستان24” راگەهاند: “تەڤایا تیمێن مە د بەشێن پاقژکرن، هۆشیارکرن و ژناڤبرنا مین و تەقەمەنیان دا د ئامادەباشیێ دانە. وەلاتی دشێن ب رێیا هێلا گەرم (182) د هەر دەم و رۆژەکێ دا بیت، تەنانەت د رۆژێن پشوویێ دا ژی، پەیوەندیێ ب مە بکەن بۆ چارەسەرکرنا هەر کێشەیەکا هەبیت.”
ناڤهاتی ئاماژە ب وێ چەندێ ژی کر کو باران و لافاوان بوویە ئەگەر جهێ مینان بهێتە گوهۆڕین یان ژ بن ئاخێ دەرکەڤن و بەرەڤ دەڤەرێن نوو بهێنە ڤەگوهاستن؛ لەوما پێدڤییە وەلاتی د دەمێ دیتنا هەر تشتەکێ نامۆ دا، دەستبەجێ لایەنێن پەیوەندیدار ئاگەهدار بکەن.
ژ لایێ خۆ ڤە رێگر بێسفکی، پەیڤدارێ رێڤەبەریا گشتی یا کاروبارێن مینان ل دهۆکێ راگەهاند: “پێدڤییە ئەو وەلاتیێن بۆ گەشت و سەیرانان دچنە دەرڤە، گەلەک هۆشیار بن، ب تایبەتی ل وان جهێن کو بەری نوکە گۆرەپانێن شەڕی بووینە و مین لێ هاتینە چاندن، دا کو گیانێ وان و خێزانێن وان یێ پاراستی بیت.”
ل گۆرەی ئاماران، ل پارێزگەها دهۆکێ (779) کێلگەیێن مینرێژکری هەبوون، هەتا نوکە (382) کێلگە ب تەمامی هاتینە پاقژکرن و رادەستی خودانێن وان هاتینە کرن. ب ئەگەرێ ڤان مین و تەقەمەنیان ژی، هەتا نوکە (120) کەسان ل سنۆرێ پارێزگەها دهۆکێ گیانێ خۆ ژ دەست دایە یان بووینە قوربانی.
هەر چەندە تیمێن مینان د ئامادەباشیێ دانە، لێ ئەرکێ سەرەکی دکەڤیتە سەر ملێن وەلاتیان کو بۆ پاراستنا گیانێ خۆ و زارۆکێن خۆ، ژ دەڤەرێن گۆمانلێکری دویر بکەڤن و پێگیریا رێنماییان بن، دا کو بهارا ئەڤ سالە نەبیتە کارەسات.
بادینان دەیلی – پشکا نووچەیان