بادینان دەیلی:
جڤاتا وەزیرێن کۆمکارا عەرەبی د نووترین هەلویستێ خۆ دا، ب فەرمی داخواز ژ کۆمارا ئیسلامی یا ئیرانێ کر کو ب شێوەیەکێ بلەز و تەمام قەرەبوویا هەمی وان زیانان بکەت یێن کو ژ ئەگەرێ هێرشێن وێ بەر وەلاتێن عەرەبی کەفتین.
د کۆمبوونا جڤاتا وەزیرێن کۆمکارێ دا، جەخت ل سەر وێ چەندێ هاتە کرن کو پێدڤییە ئیران بڕیارێن نێودەولەتی جێبەجێ بکەت و بەرپرسیارەتیا وان زیانان هەلگریت یێن ب ئەگەرێ دەستێوەردان و هێرشێن وێ گەهشتینە وڵاتێن دەڤەرێ.
هەروەسا کۆمکارا عەرەبی دۆپات کر کو نابیت ئیران ل سەر پرۆسەیا پرچەککرن و دابینکرنا هاریکاریێن دارایی بۆ گروپێن چەکدار ل دەڤەرێ یا بەردەوام بیت. ئاماژە ب وێ چەندێ ژی هاتە کرن کو پشتەڤانیکردنا گروپێن ژ دەرڤەی یاسایێ، مەترسیەکا مەزنە بۆ سەر سەقامگیری و ئاسایشا نەتەوەیی یا وڵاتێن عەرەبی و جیهانێ.
ئەڤ داخوازیا کۆمکارا عەرەبی د دەمەکێ دایە کو دەڤەرا رۆژهەلاتا ناڤین ب قۆناغەکا ئالۆز دا دەرباز دبیت و گەفێن گروپێن چەکدار یێن سەر ب ئیرانێ ڤە ل سەر رێڕەوێن بازرگانی و وڵاتێن جیران بەردەوامن.