بادینان دەیلی:
ژ پێخەمەت ڕێکخستنا پەیاما میدیایی و گەهاندنا ڕاستی و مەزناهیا وان تاوانێن مرۆڤایەتی یێن ل دژی هەرێما کوردستانێ دهێنە ئەنجامدان، فەرمانگەیا میدیا و پێزانینان یا حکومەتا هەرێما کوردستانێ، ئەڤرۆ ئێکشەمبی 29ی ئادارا 2026، کۆمەڵەکا ڕێکار و ڕێنمایێن نوو بۆ ڕووماڵکرنا جهێن زیانڤێکەفتیێن سڤیل بەلاڤ کرن.
ئارمانج ژ ڕێکارێن نوو:
لدویف ڕاگەهاندنەکا فەرمانگەیێ، ئارمانج ژ ڤێ گاڤێ نیشاندانا وێنەکێ پیشەیی یێ ڕوودانانە بۆ جڤاکێ نێڤدەولەتی و جیهانێ. بۆ ڤێ مەرەمێ ژی، فەرمانگەیا میدیا و پێزانینان داخوازێ ژ هەمی دەزگەهێن ڕاگەهاندنێ و ماڵپەڕێن نووچەیان دکەت یێن کو دڤێن ڕووماڵا مەیدانی یا وان جهان بکەن، پابەندی ڕێنمایان بن.
تۆمارکرنا تیمێن میدیایی:
د ڕێکارێن نوو دا هاتییە، پێدڤییە ئەو تیمێن میدیایی یێن ئارەزوویا ڕووماڵکرنێ دکەن، ناڤێن تیمێن خۆ ل فەرمانگەیا میدیا و پێزانینان تۆمار بکەن و پێشوەختە ڕەزامەندیا فەرمی وەربگرن دا کو بشێن ل جهێن ڕوودانان کارێن خۆ ئەنجام بدەن.
دۆکیۆمێنتکرنا زیانان:
ئەڤ بڕیارە د چوارچۆڤێ هەولێن حکومەتا هەرێما کوردستانێ دایە بۆ پۆلینکرن و دۆکیۆمێنتکرنا زیانێن مرۆڤی و ماددی ب شێوەیەکێ زانستی و پیشەیی کو خزمەتا دۆزا ڕەوا یا گەلێ کوردستانێ ل سەر ئاستێ نێڤدەولەتی بکەت.