بادینان دەیلی:
ویلایەتێن ئێکگرتی یێن ئەمریکا ب فەرمی هەلویستێ خۆ ل سەر هێرشا سەر مالا نێچیرڤان بارزانی، سەرۆکێ هەرێما کوردستانێ ل دهۆکێ ڕاگەهاند و هێرش وەک کارەکێ “تیرۆریستی و دەستدرێژی بۆ سەر سەروەرییا عێراقێ” ب ناڤ کر.
تۆمەتبارکرنا میلیشیایان:
ئەڤرۆ ئێکشەمبی، 29ی ئادارا 2026، وەزارەتا دەرڤە یا ئەمریکا د ڕاگەهاندنەکا توند دا دیار کر کو ئەو هێرشا کرییە سەر مالا تایبەت یا سەرۆکێ هەرێما کوردستانێ ل پارێزگەها دهۆکێ، ژ ئالیێ “میلیشیاێن سەر ب ئیرانێ ڤە” هاتییە ئەنجامدان. واشنتن ئەڤ کارە وەک گەفەکا ڕاستەوخۆ بۆ سەر ئاسایش و ئێکپارچەییا ئاخا عێراقێ ل قەلەم دا.
پەیاما وەزارەتا دەرڤە یا ئەمریکا:
د ڕاگەهاندنێ دا هاتییە: “ئەڤ هێرشە نە بتنێ سەرۆکێ هەرێمێ دکەنە ئارمانج، بەلکو هێرشن بۆ سەر سەروەرییا وەلاتی و تێکدانا وێ سەقامگیری و ئێکڕێزییا کو عێراق د ڤێ قۆناغێ دا پێدڤی پێ هەی.” هەروەسا ئەمریکا هێرش ب کارەکێ “نەگریس و ترسنۆکانە” ناڤ کر.
ڕەتکرنا دەستوەردانێن ئیرانێ:
ئەمریکا دوپات کر کو ئەو ب هەمی شێوەیان وان کارێن تیرۆریستی ڕەت دکەت یێن کو ژ ئالیێ “ئیران و بریکارێن وێ ل دەڤەرێ” دهێنە ئەنجامدان. واشنتن پێ پێ وایە ئەڤ جۆرە هێرشانە بۆ بەلاڤکرنا پشێوییێ نە ل هەرێما کوردستانێ و هەمی عێراقێ.