بادینان دەیلی:
سەرپەرشتێ ئیدارەیا سەربەخۆ یا سۆران ئاشکرا کر، کو پترییا وان پێشمەرگەیێن د هێرشا مۆشەکی یا سپێدەهیا ئەڤرۆ دا بریندار بووین، ژ نەخۆشخانێ دەرکەفتینە و ڕەوشا وان یا جێگیرە.
سێشەمبی، ٢٤ێ ئادارا ٢٠٢٦ێ، هەڵگورد شێخ نەجیب، سەرپەرشتێ ئیدارەیا سەربەخۆ یا سۆران ل پارێزگەها هەولێرێ ڕاگەهاند: “ژ کۆما ٣٠ پێشمەرگەیێن کو د هێرشا مۆشەکی یا سپێدەهیا ئەڤرۆ دا بریندار ببوون، ٢٨ پێشمەرگە ژ نەخۆشخانێ دەرکەفتینە و چوونە مالێن خۆ و تەندروستییا وان یا باشە.”
دەربارەی ئەو بریندارێن کو هێشتا ل ژێر چاودێرییا پزیشکی دانە، هەڵگورد شێخ نەجیب گۆت: “تەنێ دوو پێشمەرگە ل نەخۆشخانێ ماینە کو نهشتهرگهرى بۆ هاتینە کرن، چونکو برینێن وان هندەکێ د سهخت بوون، لێ نوکە تەندروستییا وان یا جێگیرە و چ مەترسی ل سەر ژیانا وان نەمایە.”
هەروەسا سەرپەرشتێ ئیدارەیا سۆران دوپات کر، کو ئەو دێ بەردەوام د چاودێرییا ڕەوشا تەندروستییا وان دا بن هەتا ب تەمامی چاک دبنەڤە.
جێگێ ببیراینانێ یە، سپێدەهیا ئەڤرۆ ئیرانێ ب شەش مۆشەکان هێرش کرە سەر هێزێن پێشمەرگەی ل سنوورێ ئیدارەیا سەربەخۆ یا سۆران، کو د ئەنجام دا مخابن ٦ پێشمەرگە شەهید بوون و ٣٠ پێشمەرگەیێن دی ژی بریندار بوون.
بادینان دەیلی | ٢٠٢٦
