بادینان دەیلی:
جڤاتا مافێن مرۆڤی یا سەر ب نەتەوەیێن ئێکگرتی ڤە، بڕیار دا کۆمبوونەکا تایبەت و بلەز ل دۆر هێرشێن سەربازی یێن دوماهیێ یێن ئیرانێ بۆ سەر وەلاتێن (بەحرەین، ئۆردن، کوێت، عومان، قەتەر، سعوودیە و ئیمارات) ئەنجام بدەت.
ئەڤرۆ چارشەمبی ٢٥ێ ئادارا ٢٠٢٦ێ، جڤاتا مافێن مرۆڤی ڕاگەهاند کو د ڤێ دانیشتنێ دا دێ گۆتۆبێژ ل سەر وان هێرشان هێتە کرن یێن کو وەلاتییێن سڤیل و ژێرخانا مەدەنی کرینە ئارمانج و بووینە ئەگەرێ گیان ژ دەستدانا ژمارەکا وەلاتییێن بێ گونهە ل وان وەلاتان. بڕیارە کۆمبوون ل هۆلا جڤاتێ ل “کۆشکا نەتەوەیان” ل باژێرێ جنێف ب ڕێڤە بچیت.
ئەڤ گۆتۆبێژا ب پەلە ل سەر داخوازەکا فەرمی یا وەلاتێ بەحرەینێ دهێت، کو ب نوونەراتییا وەلاتێن جڤاتا هاریکارییا کەنداڤ و ئۆردنێ پێشکێشی نەتەوەیێن ئێکگرتی کربوو. د داخوازنامێ دا هاتییە کو ئەو وەلات پێشنیارا پڕۆژە بڕیارەکێ دکەن د چوارچۆڤێ ڤێ گۆتۆبێژێ دا دژی وان هێرشان.
ژ پێخەمەت ئەنجامدانا ڤێ کۆمبوونێ، گۆڕانکاری د بەرنامەیێ کارێ خولا ٦١ێ یا ئاسایی یا جڤاتا مافێن مرۆڤی دا هاتییە کرن. ئەڤە یازدەهەمین گۆتۆبێژا ب پەلە یا جڤاتێ یە ژ دەمێ دامەزراندنا وێ ل سالا ٢٠٠٦ێ وەرە، کو نیشانا مەترسییا بارودۆخێ نوکە یێ دەڤەرێ ددەت.
بادینان دەیلی | ٢٠٢٦
