بادینان دەیلی:
فراکسیۆنا پارتی دیموکراتی کوردستان ل پەرلەمانێ ئیراقێ، ب توندی هێرشا مۆشەکی یا کۆمارا ئیسلامی یا ئیرانێ بۆ سەر بارەگایێن هێزێن پێشمەرگەی ل سنۆرێ سۆران شەرمزار کر و ڕاگەهاند کو ئەڤ جۆرە کریارێن “نەمەردانە” ناتوانن ئیرادەیا گەلێ کوردستانێ بشکێنن.
ل دویڤ بەیاننامەیەکا فراکسیۆنا پارتی کو ئەڤرۆ سێشەمبی ٢٤ێ ئادارا ٢٠٢٦ێ هاتییە بەلاڤکرن، سپێدەهیا ئەڤرۆ ئیرانێ ب ٦ مۆشەکان هێرش کرییە سەر بنگەهـ و بارەگایێن هێزێن پێشمەرگەی. وەزارەتا پێشمەرگەی ژی ئاشکرا کر کو د ئەنجاما ڤێ هێرشا تیرۆرستی دا، ٦ پێشمەرگە شەهید بووینە و ٣٠ پێشمەرگەیێن دی ژی بریندار بووینە.
فراکسیۆنا پارتی د بەیاننامەیا خۆ دا ئاماژە ب وێ چەندێ کر کو هێزێن پێشمەرگەی هێزەکا یاسایی و دەستووری نە و هەمی دەمان پارێزەرێن ئاسایش و سەقامگیریێ بووینە. هەروەسا هاتە دیارکرن: “پێشمەرگە چ جاران نەبوویە مەترسی بۆ سەر چو ئالییەکی، ب تایبەتی جیرانێن هەرێما کوردستانێ. لەوما ئەڤ هێرشە بنپێکارییەکا ئاشکرا یا سەروەرییا ئاخا هەرێمێ و ئیراقێ یە و دژی هەمی پرەنسیپێن جیرانییا باش و یاسایێن نێڤدەولەتی یە.”
د پشکەکا دی یا بەیاننامێ دا، داخواز ژ حکومەتا فیدرال یا ئیراقێ هاتییە کرن کو بەرپرسیارتییا خۆ یا دەستووری هەلگریت و ب ڕێیا کەنالێن دیپلۆماسی هەلوەستەکێ جدی بۆ پاراستنا سەروەرییا وەلاتی هەبیت. هەروەسا داخواز ژ جڤاکا نێڤدەولەتی و نەتەوەیێن ئێکگرتی هاتە کرن کو ڕۆلێ خۆ ببینن بۆ دانانا سنۆرەکی بۆ ڤان بنپێکارییێن بەردەوام.
فراکسیۆنا پارتی دوپات کر کو هەرێما کوردستانێ هەمی دەمان بێئالیبوونا خۆ د شەڕ و کێشەیێن دەڤەرێ دا پاراستی یە و خواست و ئیرادەیا خەلکێ مە بۆ ئاشتی و ئارامیێ ژ هەر دەستدرێژییەکێ بێهێزترە. ل دویماهیێ ژی ڕاگەهاند: “کوردستان ب ڤان جۆرە هێرشێن نەمەردانە ناشکێت و چ جاران پاشڤە ناچیت.”
بادینان دەیلی | ٢٠٢٦
